شینزن۔ 05 جون (اے پی پی) چینی کمپنی ترانشیئن ہولڈنگ پاکستان اٹ تینا موبائل جوڑ کننگ نا یونٹ اٹی زرکاری ٹی وسعت و چار بشخ موبائل فون تا تیاری، الیکٹرک بائیکس، پوسکن آ کشت وکشار و فن ٹیک اٹی زرکاری ٹی بھاز است خواہی نا درشانی ءِ کرینے و وزیراعظم محمد شہباز شریف پارے کہ حکومت درملکی زرکارو کاروباری شخصیت آتے آسراتی تا فراوانی ءِ پک کننگ اٹی ءِ، ٹرانشیئن ہولڈنگز پاکستان اٹ ہندی کہول آ گڑاتیار کرسا اوفتے پاکستان آن پیشن نا ملک برآمدات کے۔ اوداخیال آتا درشانی ءِ چارشنبے نادے آ داڑے چینی کمپنی ترانشیئن ہولڈنگز نا بانی و چیئرمین ژوژاؤجیانگ تون گپ وتران کرساکرے ہرا وزیراعظم محمد شہباز شریف تون اوڑدہی کرے۔ داوخت آ بنجائی وزیر اسحاق ڈار، خواجہ محمد آصف، احسن اقبال ، محمد اورنگزیب، عبدالعلیم خان، جام کمال، عطاء اللہ تارڑ و وزیرمملکت شزہ فاطمہ خواجہ ئسک ہم ساڑی ئسر۔ وزیراعظم بنجائی وزیر و چین اٹی پاکستان نا سفیر ءِ ٹرانشیئن ہولڈنگز اتون اواری اٹ اسہ لائحہ عمل اس تیار کننگ نا پارت کرے۔ اوپارے کہ پاکستان تون ہروڑنا وسیلہ ارے، ننا غٹ آن بھلا طاقت ننا ورناافرادی قوت ءِ۔ اوڑدہی ٹی ٹرانشیئن ہولڈنگز نا چیئرمین وزیراعظم ءِ کمپنی نا پاکستان اٹی ساڑی آ آپریشن، جہانی کہول آ دانا برآمدات و پاکستان اٹ پین زرکاری نا ڈٹ آتیان معلومدار کرے۔ چیئرمین ٹرانشیئن ہولڈنگز وزیراعظم ءِ پارے کہ کمپنی نا پاکستان اٹی موبائل فون تا تیاری نا بابت مہالو آن استہ یونٹ اس جوڑ ءِ ہراٹی 5 ہزار آن زیات پاکستانی تے روزگار فراوان کننگانے۔ کمپنی پاکستان اٹ موبائل فون تا بابت تینا زرکاری ٹی ودفنگ اٹی بھاز است خواہی تخک ہراڑآن موبائل فون تا تیاری آن پد پاکستان آن اوفتا برآمد آتیٹی ودکی مریک۔
