اسلام آباد۔ 04 جون (اے پی پی) بنجائی وزیر کانود و انصاف سینیٹر اعظم نذیر تارڑ پارینے کہ پاکستان اٹی غٹ مذہب آتا منوک آتے پورو مذہبی آجوئی دوئی ءِ، پاکستان نا شونداری ٹی سکھ برادری نا اہم ءُ کڑ داسے، پاکستان نا الس سکھ روایت آتا بھاز شرف ءِ کیک، بین المذاہب ہم آہنگی نا مون آدننگ وخت انا خواست ءِ، گورونانک نا تعلیمات مادیت پرستی نا نفی ءِ کیک، غٹ سکھ آتے پاکستان آ بننگ آ بخیر اٹ پاوہ، اسہ مذہب اس ہم خار و بیدادی نا موکل تفک، انسانیت نا خذمت ننا نصب العین بایدے مرے، وزیراعظم محمد شہباز شریف نمکن سلام مون تسنے، پاکستان بروک آ سکھ یاتری تیکن پین آسانی ودی کننگ اٹی ءِ۔ داخیال آتا درشانی ءِ او جہانی امن و شونہالی ٹی ’’سکھ ازم ‘‘ انا کڑد انا بابت داڑے اڈ ہلوک سیمینار آن تران کرساکرے۔ بنجائی وزیر کانود اعظم نذیر تارڑ پارے کہ پاکستان اٹ سکھ ازم انا تاریخ متکن ءِ۔ پاکستان نا جوڑ مننگ آن پد آن ہلیس داتم اسکان پاکستان مذہبی رسم آتا ادائیگی کن بروک آ سکھ برادری نا باسک آتا مدام پرجوش خیرمقدم ءِ کرینے۔ اعظم نذیر تارڑ مستی پارے کہ ہراتم گورونانک دادنیا غان رخصت مس تو اونا منوک آتیٹی مسلم و ہندو برادری نا بھلو کچ اس ہم اوار ئسر۔
