شینزن۔ 04 جون (اے پی پی) پاکستانی ڈل بزنس ٹو بزنس دیوان کن چین نا شار شینزن آ سرمس، 79 پاکستانی کمپنی تا نمائندہ چینی کمپنی تتون اوڑدہی کیک۔ سے شنبے نادےآ پلاننگ کمیشن نا ترجمان نا رداٹ وزیراعظم محمد شہباز شریف ہم تینا دورہ ءِ چین نا اولیکو ریسہ ٹی شینزن اٹی پوسکن آ آئی ٹی کمپنی تا عہدیدار آتون اوڑدہی کیک۔ داوخت آ فضل سٹیل نا الیاس عزیز ملک پارے کہ ہندن ءُ ٹیکنالوجی اس درستی راستی کرفنگ خوانہ ہرا پاکستان اٹی گچین وڑاٹ کاریم کننگ کے، دامسخت کن ای چین آ بسونٹ۔ چائنیز پاکستان اٹ زرکاری کننگ خوارہ، اوفتے اسہ جوان ءُ پارٹنراسے نا گرج ءِ، ننا کوشست مریک کہ چائنیز پاکستان اٹ زرکاری کیر و پاکستان نا برآمدآتیٹی ودکی مرے۔ سوگو گروپ آف کمپنیز نا عبدالخلیق جعفرانی پارے کہ چین نا شونداری ننا مون آٹی ءِ۔ کنا پیرہ 1950 ء نا دہائی آن مست چین اٹی کاروبار نا بناءِ کریسس، اینو چارمیکو چین ہموکان کاریم کننگ اٹی ءِ۔ پاکستان اٹ ٹیکنالوجی ٹرانسفر مننگ آن ملک شون ہلیک۔ پاکستان اٹ بجلی نا کمتی نا ویل ءِ، سولر پینل و انورٹر تیار کننگ نا بشخ اٹی کاریم مننگ کیک۔ اگہ پاکستان نا تہہ آن مینو فیکچرنگ مریک تو اوڑآن زیات فائدہ دوئی کننگ مریک۔ ساڑی حکومت نا گام گیج آتیان ملک شون ہلیک، پاکستان اٹ انڈسٹری لگنگ آن ملک انا ہی فائدہ مریک۔ فوٹون برینز نا فیضان فیض پارے کہ حکومت کاروباری شخصیت آتے آسراتی فراوان کننگ اٹی ءِ۔ اول کاروباری شخصیت آتے تینا کلائنٹ تینٹ پٹوئی مسکہ۔ حکومت نا کنڈآن بزنس ٹو بزنس میٹنگ آتیٹی آسراتی نا فراوانی ستاکڑزک، نن ملک اٹی چائنیز زرکاری ءِ اتنگ کن پرامید اُن۔
