لاہور۔ 04 جون (اے پی پی)وزیراعظم محمد شہباز شریف تینا دورہ ءِ چین ءِ پاک چین سنگتی و کمکاری کن مزل نا نشان گوندسا پارینے کہ ہڑتوم آ ملک آتا نیام اٹ کشت وکشار، بنداوی پنجر نا شونداری، کسبی تربیت، گوادر پورٹ انا ودکی، صنعت، معدنیات و انفارمیشن ٹیکنالوجی تون اوار چندی بشخ آتیٹی پوسکن ءُ شریداری اس جوڑمریک، سی پیک اسہ پوسکن ءُ دور اسے ٹی پترینگک، دورہ ٹی سی پیک فیز ٹو، بزنس ٹو بزنس رابطہ، حکومت تون حکومت نا کہول آ بھلا ڈٹ آتیا سجفنگک، کنا دورہ ہڑتوم آ ملک آتا سنگتی نااسہ پین بڑزو سمت اس متعین کیک۔ سے شنبے نادے آچین نا پنچ دے ئی دورہ غا روانگی آن مست اسہ بیان اسے ٹی وزیراعظم پارے کہ اودے بھاز خوشی مننگ ءِ کہ او متکن سنگت چین انا دورہ غا ہِننگ ءِ، چین وپاکستان سنگتی نا بے مٹ رشتہ غاتیٹی تفوک ءُ، اولیکو دے آن نن اسہ ایلو آ پبی پت کینہ، چین پاکستان نا اسہ ہندن ءُ سنگت اسے ہرانا دنیا ٹی ہچ ءُ درور اس ملیپک، پاکستان و چین علاقائی و جہانی امور آ تین پہ تینی سلابت اٹ اسہ وڑنا موقف تخرہ، خلیجی برادر ملک آک ہم ننا بے پناہ باپت سنگت ءُ، پاکستان تون چین نا تعلق اسہ ہمسایہ سے نا تعلق ءِ و دا تعلق تدوک آ 75 سال آ تالان ءِ چین ہرمشکل وخت اٹی پاکستان نا غیرمشروط ساتھ تسنے زمی جمب، جنگ و مشکل آتیٹی چین پاکستان نا اسہ ایلم اسے آنبار تفینے، مسکوہی وزیراعظم نواز شریف نا تدوک آ دور اٹی چین اتون پاکستان نا سنگتی و تعلق اسہ پوسکن ءُ ریسہ سے ٹی داخل مس و سی پیک نا کمک اٹ پاکستان اٹی محمد نواز شریف بطور وزیراعظم پاکستان اٹ کم و ود 45 ارب ڈالر نا زرکاری نا بست وبند کرے و اونا نتیجہ ٹی پاکستان اٹ بے پناہ شونہالی بس و غٹ آن بھلا و سنگین ویل کہ بجلی نا مفننگ ناسوب آن ملک اٹی تہاری تالان ئس ، ننا صنعت آک دم تسوسر و ننا خرن انگا کھیت آک باریسوسر ولے چین نا گچین کمکاری نا سوب آن پاکستان اٹی نواز شریف نا دور اٹی نئے بیرہ بجلی نا تہاری ہنا بلکن شونداری وشونہالی نا دور ترندی اٹ مون آ ہنا ہراڑآن پاکستان نا مخالف آتے تکلیف ہم مس اوکان پد ہم دا سنگتی پدریسہ مون آ ہِننگ ءِ۔ وزیراعظم پارے کہ چین نا ننا دورہ پاک چین سنگتی نا اسہ پین بڑزکو سمت اس متعین کیک و داٹی سی پیک پوسکن آ دور اٹی پترینگک ہرادے سی پیک فیز ٹو انا پن ءِ ای ایتیوہ دادور اٹی بزنس ٹو بزنس رابطہ و تعلقداری ٹی گچینی اتنگ نا پبی کوشست کننگک و ہنداوڑاٹ حکومت تون حکومت نا کہول آ بھلا ڈٹ آتیا ہم مربوط گپ وتران کینہ۔ وزیراعظم پارے کہ چین نا صدر شی جن پھنگ اسہ مرہروک ءُ راہشون اسے اونا سوچ و آخبت نا بابت اونا ڈٹ آتا سوب آن نئے بیرہ چین اٹی شونہالی و شونداری نا انقلاب بسنے بلکن چین دنیا ٹی ارٹ میکو بھلا زرگزرانی و فوجی طاقت جوڑمسنے۔ وزیراعظم پارے کہ صدر شی جن پنگ نا سوچ ، انداز، فکر و وژن نا بنداو آ دنیا ٹی جنگ آتا چٹفنگ کن کوشست کننگ انگ ءِ و دنیا ٹی امن، شونہالی و شونداری ءِ مون آ دننگ انگ ءِ اونا سرکڑدہ ئی نا است اٹ معترف اُٹ او اسہ عظیم ءُ لیڈر اسے ہرا پاکستان وچین نا سنگتی ءِ نئے بیرہ ہمالیہ غانبار بڑزو سمندر آن کڑمب کرے و داٹی ہنینی نا ہمو رنگ ءِ شاغانے ہرا شاد آن ہم زیات ہنین ءِ و داٹی طاقت نا ہمووزن ءِ شاغانے ہرا این آن ہم زیات سخت ءِ۔ وزیراعظم پارے کہ دادورہ ٹی کنا سنگت وزیر، سرکاری آفیسر و چاہندار آک کنا کمک ءِ کیرہ و پکا یقین ءِ کہ دے و نن خواری و سچااست اٹ و خلوص نیت اٹ چینی سرکڑدہ غاتون گپ و تران کینہ و پوسکن ءُ معاہدہ مریک و چندی بشخ آتیٹی پوسکن شریداری جوڑ مریک۔ وزیراعظم پارے کہ دورہ ٹی کشت وکشار اٹی پوسکن آ ازباب و پوسکن آ وڑوڈول آتا کاریم اٹ اتنگ، انفارمیشن ٹیکنالوجی و پاکستان اٹ ورناچین کن کسبی تربیت، بنداوی پنجر نا شونداری، صنعت آتا مون آ دننگ و خاص وڑاٹ خصوصی اقتصادی زون و گوادر پورٹ ءِ پین ودفنگ کون آ ڈٹ آتیا گپ وتران مریک، معدنیات و کانڑ کنی نا بشخ اٹی کمکاری آ ہم گپ وتران کننگک۔
