لاہور۔ 04 جون (اے پی پی) وزیراعظم محمد شہباز شریف چین نا پنچ دے ئی سرکاری دورہ غا روانہ مس۔ وزیراعظم آفس نا میڈیا ونگ انا کنڈآن جاری بیان نا رداٹ نائب وزیراعظم و وزیرخارجہ محمد اسحاق ڈار، وزیردفاع خواجہ محمد آصف ، بنجائی وزیر ڈٹ بندی احسن اقبال، وزیرخزانہ و محصولات محمد اورنگزیب، بنجائی وزیر پیٹرولیم مصدق ملک و بنجائی وزیر حوالکاری و شینکاری عطاء اللہ تارڑ ئسک ہم وزیراعظم تون اوار ءُ۔ وزیراعظم محمد شہباز شریف چینی صدر شی جن پھنگ و چینی وزیراعظم لی چیانگ نا خصوصی سلہ غا 4 آن 8 جون اسکان چین نا پنچ دے ئی سرکاری دودرہ ءِ کننگ اٹی ءِ۔ بیان نا رداٹ وزیراعظم نا دورہ ءِ چین، چین پاکستان اقتصادی راہداری نا ارٹ میکو ریسہ و پاکستان چین اسٹریٹجک و اقتصادی تعلقداری نا پین مون آ دننگ کن بھاز اہمیت تخک۔ وزیراعظم تینا دورہ نا اولیکو ریسہ ٹی چینی شار شینزن آکاہک۔ وزیراعظم ہڑتوم آ ملک آتا کاروباری شخصیت و زرکارآتا نیام اٹ شریداری نا مون آ دننگ کن چین نا شار شینزن اٹی بزنس فورم اٹی بشخ ہلیک۔ داکان بیدس وزیراعظم چینی ون ونڈو آپریشن نا مشاہدہ کن نانشان ون ونڈو و ہواوے نا ہیڈ کوارٹرزنا دورہ ءِ ہم کیک۔ وزیراعظم نا دورہ نا ارٹ میکو ریسہ ٹی بیجنگ آ کاہک ہراڑے اونا چین نا بڑزکو سرکڑدہ غاتون اوڑدہی مریک۔ وزیراعظم چینی صدر شی جن پھنگ و چینی ہم منصب لی چیانگ تون اوڑدہی کیک۔ وزیراعظم چین و پاکستان نا نیام اٹ چندی بشخ آتیٹی کمکاری نا مفاہمتی یات داشت آتیا دستخط نا دود اٹی بشخ ہلیک۔ داکان بیدس او بڑزکو سرکاری عہدیدار، چندی کمپنی تا سروک و چینی زرکارآتون اوڑدہی ہم کیک۔ بیجنگ اٹی وزیراعظم السی یات گار(پیپلزمانومنٹ) نا دورہ ءِ ہم کیک۔ وزیراعظم تینا دورہ ءِ چین نا آخیریکو ریسہ ٹی چینی شار شیان آ کاہک ہراڑے ہندی سرکڑدہ غاتون اوڑدہی تون اوار اوار وزیراعظم چین نا کشاری شونداری ٹی پوسکن آ ٹیکنالوجی نا کاریم اٹ اتنگ نا مشاہدہ کن ماڈل فارمز و گرین ٹیکنالوجی کمپنی تا دورہ ءِ کیک۔ دورہ ٹی پاکستان و چین نا نیام اٹ نئے بیرہ سی پیک نا ارٹ میکو ریسہ، اسٹریٹجک شریداری بلکن واپار وزرکاری ، دفاع، قومی و علاقائی سلامتی، توانائی، خلائی پٹ وپول، سائنس و ٹیکنالوجی ، تعلیم و کسب و دودوربیدہ ئی بشخ اٹی کمکاری ءِ مون آ دننگ آ گپ وتران مریک۔ بیان نا رداٹ وزیراعظم شہباز شریف نا دورہ ءِ چین ہڑتوم آ ملک آتا شریداری ءِ پین مثبت سمت آ دننگ اٹ اہم مزل نا نشان مریک۔
