کوئٹہ۔ 03 جون (اے پی پی) ایمرجنسی آپریشن سینٹر بلوچستان نا کوآرڈی نیٹر سید زاہد شاہ پارینے کہ بلوچستان نا 14 ضلع غاتیٹی انسداد پولیو مہم دوشنبے نادے 3 جون آن بناکرینے، غٹ لمہ و باوہ غاتیان خواست ءِ کہ صوبہ ٹی پولیو کیس انا ساڑی گری نا سوب آن لمہ و باوہ دا خصوصی مہم اٹی پولیو ٹیم آتون تینا کمک ءِ پک کیر۔ سید زاہد شاہ پارے کہ ہیٹ ویو نا سوب آن شش ضلع غاتیٹی مہم 8 جون آن بناکننگ نا فیصلہ ءِ کننگانے، مہم اٹی 20 ضلع غاتیٹی جم وڑاٹ 18 لکھ 84 ہزار آن زیات چناتے پولیو غان بچفنگ نا پڑی کنفنگک، پولیو مہم اٹی 7 ہزار 636 نا خڑک ٹیمک بشخ ہلیرہ ہرافتے ٹی 5 ہزار 933 موبائل ٹیم، 519 فکسڈ سائٹ و 429 ٹرانزٹ پوائنٹ اوار ءُ۔ داخیال آتا درشانی ءِ او پولیو مہم اٹی میڈیا تون گپ وتران کرساکرے۔ اوپارے کہ انسداد پولیو مہم 3 جون آن بلوچستان نا ضلع، کوئٹہ، پشین، قلعہ عبداللہ، چمن، حب ، چاغی، دکی ، لسبیلہ، خضدار، ژوب، نوشکے، قلعہ سیف اللہ، لورالائی و مستونگ اٹی بناکننگ انگ ءِ، وخت اس کہ ترند انگا باسنی و ہیٹ ویو نا پیشگوئی نا رداٹ نصیر آباد، سبی، جعفر آباد، اوستہ محمد ، ڈیرہ بگٹی و صحبت پور اٹی 8 جون آن مہم بناکیک اوپارے کہ مہم نا غٹ تیاری تے پورو کننگانے۔ اوپارے کہ سول سوسائٹی، استاد و عالم دینک خصوصی وڑاٹ دا خاص انگا مہم اٹ تینا کمکاری ءِ پک کیر۔ یات سلے کہ بلوچستان اٹی مسہ سال آن پد پولیو نا 3 کیس چمن، ڈیرہ بگٹی و قلعہ عبداللہ غان رپورٹ مسنے۔ اوپارے کہ پولیو ورکرآک ہروڑنا سخت انگا موسمی حالیت آتیان پد ہم قومی فرض ءِ پورو کننگ اٹ تینا فرض ءِ جوانی اٹ پورو کرینو، ہروار آنبار رکھی ٹیکہ جاتی نظام ءِ ہم سوگو بنداو تیا استوار کننگ انگ ءِ۔
