وزیراعظم شہباز شریف چین نا صدر و وزیراعظم نا سلہ غا 4 آن 8 جون  چین نا دورہ ءِ کیک، دفترخارجہ

اسلام آباد۔ 31 مئی (اے پی پی) وزیراعظم محمد شہباز شریف عوامی جمہوریہ چین نا صدر شی جن پنگ و وزیراعظم لی کیانگ نا سلہ غا 4 آن 8 جون اسکان چین نا سرکاری دورہ ءِ کیک۔ جمعہ نادے آ دفترخارجہ نا ترجمان نا کنڈآن جاری بیان نا رداٹ وزیراعظم بیجنگ آن بیدس ژیان و شینزن شارتا ہم دورہ ءِ کیک۔ بیجنگ اٹی اڈکننگ نا وخت آ وزیراعظم صدر شی جن پنگ تون اوڑدہی کیک و وزیراعظم لی کیانگ تون ڈل آتا کہول آ گپ وتران کیک ، اونیشنل پیپلزکانگریس نا سٹینڈنگ کمیٹی نا چیئرمین ژاؤ لیجی و اہم سرکاری محکمہ غاتا سروک آتون ہم اوڑدہی کیک۔ بیان نا رداٹ وزیراعظم نا دورہ نا اسہ اہم پلو تیل و گیس، توانائی، آئی سی ٹی و مون آ بروک ٹیکنالوجی تا سرکڑدہ چینی کمپنی تا کارپوریٹ ایگزیکٹیوز آتون اوڑدہی مریک ۔ وزیراعظم شینزن اٹی ہڑتوم آ ملک آتا سرکڑدہ پوریاگر، کاروباری شخصیت و زرکارآتون اوار اوار چائنا پاکستان بزنس فورم آن تران کیک۔ او چین اٹی اقتصادی و کشاری زون تا ہم دورہ ءِ کیک۔ وزیراعظم نا دورہ ءِ چین، پاکستان و چین نا سنگتی نا شاہدی ءِ ہرانا خاصیت بڑزکو کہولی ہن و بر و گپ وتران آن مریک۔ دورہ ٹی فریق آتا ہمہ موسمی سٹریٹجک کوآپریٹیو پارٹنرشپ آ گپ وتران کیرہ ۔ فریق آک چین پاکستان اقتصادی راہداری ءِ اپ گریڈ کننگ، واپار و زرکاری ءِ مون آدننگ، سلامتی و دفاع، توانائی، سپیس ، سائنس و ٹیکنالوجی و تعلیم اٹ کمکاری ءِ ودفنگ تون وار دودوربیدہ ئی کمکاری و الس نا نیام اٹ رابطہ غاتے مون آ درسا پاک چین سنگتی نا آخبت نا سمت ءِ طے کرسا مستی سوگو کننگ کن گپ وتران کیرہ۔