پاکستان نا اقوام متحدہ ٹی فلسطینی تا حق اٹی توار بڑز کننگ آ ایماندار ایرانی صدر ءِ خراج عقیدت، امریکہ نا دود آن بائیکاٹ

اقوام متحدہ ۔ 31 مئی (اے پی پی) پاکستان اقوام متحدہ نا جنرل اسمبلی ٹی اسلامی ملک آتا نمائندگی ءِ کرسا ایماندار ایرانی صدر ابراہیم رئیسی نا خذمت خاص وڑاٹ فلسطینی تا حق اٹی توار بڑز کننگ و بیت المقدس نا رکھ اکن او آئی سی نا کوشست آتیٹی کمکاری آ اودے خراج عقیدت پیش کرینے۔ اقوام متحدہ نا 193 باسکی جنرل اسمبلی روایتی وڑاٹ ہروڑنادا جہانی راہشون ءِ خراج تحسین پیش کننگ کن نشست نا بست وبند کیک ہرا تینا مرک انا وخت ریاست نا سروک نا عہدہ غا مریک۔ جنرل اسمبلی نا دا نشست اٹی پاکستان نا سفیر منیرا کرم پارے کہ ایماندار صدر نا کماشی، پامداری و امنائی سلاہ نا سیاست نا سوب آن ، او آئی سی نا ایلو راہشون تا پدریسہ مخ تفی آن دا تنظیم جہانی امن، سلامتی و شونہالی نا مون آ دننگ کن زیات مربوط و جوان ءُ قوت اس جوڑ مسنے۔ جنرل اسمبلی ٹی ایماندار ایرانی صدر ابراہیم رئیسی ءِ خراج عقیدت پیش کرسا اسہ لمحہ کن چُپی اختیار کننگ آن پد اونا پیش کروک خذمت آتے خراج تحسین پیش کننگا ولے امریکہ ایماندار صدر رئیسی آ انسانی حق انا خلاف ورزی تا دوبہ ءِ خلسا دادود انا بائیکاٹ کرے۔ پاکستانی سفیر دعاکرے کہ او ایماندار صدر ابراہیم رئیسی ءِ جنت الفردوس اٹی جاگہ ایتے۔ منیر اکرم ایران اٹی راجی، اقتصادی و سیاسی بدلی ٹی ایماندار صدر ابراہیم رئیسی نا خذمت آتے ہم مون آ تخسا پارے کہ ایماندار ایرانی صدر خیرخواہی نا اسہ آخبتی ءُ میرات اس سلک۔ اومستی پارے کہ ابراہیم رئیسی اسلامی کمکار تنظیم نا باسک ملک آتا نیام اٹ دوستانہ تعلقداری تے مون آدننگ تون دا تنظیم نا باسک ملک آتا نیام اٹ سوگو ہڑتوم آ کنڈآتا و کثیر الجہتی تعلقداری تے سوگو کرے۔