حکومت ملکی برآمدآتیٹی ودکی کن اولیتی بنداو تیا گام گیج کننگ اٹی ءِ، آٹوسیکٹر ہندی کہول آ گاڈی تیار کے، وزیراعظم شہباز شریف نا ڈل اتون گپ وتران

اسلام آباد۔ 31 مئی (اے پی پی) وزیراعظم محمد شہباز شریف پارینے کہ حکومت ملکی برآمد آتیٹی ودکی کن اولیتی بنداوتیا گام گیج کننگ اٹی ءِ، آٹو سیکٹر پاکستان اٹ ہندی کہول آ گاڈی تیار کے۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او آٹو و آٹوپارٹس مینو فیکچررز نا ڈل اتون گپ وتران کرسا کرے ہرا جمعہ نادے آ داڑے اوڑتون اوڑدہی کریر۔ ڈل اٹی چیف ایگزیکٹیو آفیسر ٹویوٹا پاکستان علی جمالی، آٹوپارٹس صنعت نا نمائندہ عامراللہ والا ئسک اوار ئسر۔ اوڑدہی ٹی بنجائی وزیر صنعت رانا تنویر حسین بنجائی وزیر واپار جام کمال خان، وزیراعظم نا کوآرڈی نیٹر رانا احسان افضل، چیئرمین ایف بی آر و تعلقدار بڑزکو کمامدارآک ساڑی ئسر۔ داوخت آ ڈل حکومت نا کاروبار و زرکار دوست پالیسی تیا وزیراعظم ءِ خراج تحسین پیش کرے و آٹو سیکٹر ءِ مون تروک ویل آتا بابت معلومدار کرے۔ داوخت آ وزیراعظم پارے کہ آٹو سیکٹر پاکستان اٹی ہندی کہول آ گاڈی تا تیاری کے۔ آٹو سیکٹر تینا گڑاتا اسہ خاطرخواہ ءُ بشخ اسے برآمد کے و ملکی شونداری ٹی تینا کڑد ءِ اداکے۔ آٹو سیکٹر ڈیلیشن نا پالیسی آ عملدرآمد کے۔ وزیراعظم پارے کہ پاکستان نا آٹوپارٹس نا صنعت جہانی ویلیو چین نا بشخ جوڑ مرے۔ حکومت ملکی برآمد آتیٹی ودکی کن اولیتی بنداوتیا گام گیج کننگ اٹی ءِ۔