وزیراعظم نا دورہ ءِ چین اٹی بھرمی بزنس ٹو بزنس اوڑدہی تا بابت جوان ءُ پلان اس ترتیب تننگ نا پارت

اسلام آباد۔ 31 مئی (اے پی پی) وزیراعظم محمد شہباز شریف دورہ ءِ چین اٹی بھرمی بزنس ٹو بزنس اوڑدہی تا بابت جوان ءُ پلان اس ترتیب تننگ و چینی انڈسٹری ءِ پاکستان اٹ صنعت خلنگ نا ترغیب تننگ نا بابت لائحہ عمل اس جوڑ کننگ نا پارت کرساپارینے کہ حکومت چینی صنعت کار و زرکارآتے ہرممکن آسراتی فراوان کیک۔ جمعہ نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او تینا کماشی ٹی وزیراعظم نا دورہ ءِ چین نا تیاری تا بابت سہب انا 7 بجہ غا اہم ءُ جاچ دیوان اسے ٹی کرے۔ دیوان اٹی نائب وزیراعظم و وزیرخارجہ اسحاق ڈار ، بنجائی وزیر واپار جام کمال خان، بنجائی وزیر اقتصادی امور احدخان چیمہ ، بنجائی وزیر صنعت و پیدوار رانا تنویر حسین، بنجائی وزیر حوالکاری و شینکاری عطاء اللہ تارڑ، بنجائی وزیر پیٹرولیم مصدق ملک، بنجائی وزیر نجکاری عبدالعلیم خان، وزیر مملکت انفارمیشن ٹیکنالوجی و ٹیلی کام شزا فاطمہ، وزیراعظم نا خصوصی کمکار طارق فاطمی، وزیراعظم نا کوآرڈینیٹر رانا احسان افضل، ڈپٹی چیئرمین پلاننگ کمیشن جہانزیب خان و بڑزکو سرکاری آفیسر آک بشخ ہلکر۔ بنجائی وزیر ڈٹ بندی احسن اقبال و چین اٹی تعینات پاکستان نا سفیر نا دیوان اٹی بذریعہ ویڈیو لنک شریک مس۔ دیوان اٹی وزیراعظم پارت کرے کہ دورہ ٹی ہڑتوم آ مملک آتا بھرمی بزنس ٹو بزنس اوڑدہی تا بابت جوان ءُ پلان اس ترتیب تننگے، چینی انڈسٹری ءِ پاکستان اٹ صنعت خلنگ نا ترغیب تننگ نا بابت لائحہ عمل اس جوڑ کننگے۔ وزیراعظم پارے کہ حکومت چینی صنعت کار و زرکارآتے ہرممکن آسراتی فراوان کیک۔ وزیراعظم چین اٹی تعینات پاکستانی سفیر ءِ پاکستانی کاروباری ڈل ءِ چین اٹی ہرممکن آسراتی فراوان کننگ نا ہم پارت کرے۔ دیوان اٹی وزیراعظم ءِ دورہ ءِ چین نا تیاری تا بابت سرجمی اٹ حوال تننگا۔ وزیراعظم ءِ پاننگاکہ پاکستان آن صنعت کار، زرکار و کاروباری بندغ آتا اسہ ڈل اس ہم وزیراعظم تون اوار چین نا شار شینزن آ کاہک۔ داڈل چینی کاروباری برادری تون اوڑدہی کیک و پاکستان و چین نا نیام اٹ بزنس ٹو بزنس تعلقداری تا بابت گپ وتران کیک۔