پاکستانی حاجی تا بننگ نا چرجوئی برجاء، 170 جہا ز آتا کمک اٹ 41 ہزار 477 سرکاری حاجی سعودی عرب آ سرمسر، ترجمان وزارت مذہبی امور

مکہ مکرمہ۔ 30 مئی (اے پی پی) سعودی عرب اٹی پاکستانی حاجی تا بننگ نا چرجوئی برجا، 170 جہاز آتا کمک اٹ 41 ہزار 477 سرکاری حاجی سعودی عرب آ سرمسنو، بروک آ دہ دے اٹی پین 28 ہزار 628 سرکاری حاجی حج مکہ مکرمہ غا سرمریرہ۔ ترجمان مذہبی امور نا رداٹ داسال پاکستانی حج مشن 70 ہزار 105 سرکاری حاجی و 80 ہزار آن زیات پرائیویٹ حاجی تا مہمانداری ءِ کیک، نجی حج اسکیم نا کمک اٹ 10 ءُ نیم ہزار آن زیات حاجی سعودی عرب آ سرمسنو، یکم جون اسکان براہ راست مدینہ منورہ غا بروک آ غٹ حاجیک مکہ مکرمہ غا سرمریرہ۔ اوپارے کہ سعودی کمامدارآتا خاص کمک اٹ مدینہ منورہ ٹی 30 ہزار 9 سد حاجی تے ریاض الجنہ کرفنگانے، موبائل ایپ پاک حج، دوٹال فری ہیلپ لائنز و 4 واٹس ایپ نمبرآتا کمک اٹ حاجی تا غاوتا ازالہ ءِ کننگ انگ ءِ۔ اونا پاننگ ئس کہ حرمین اٹی 2 مرکزی ہسپتال و درجن بھر ڈسپنسری تا کمک اٹ 282 ڈاکٹر و طبی عملہ طبی آسراتی فراوان کننگ ءُ، پاکستانی حج مشن نا مرکزی ہسپتال آتیٹی پوسکن آ ایمبولینس، لیبارٹری، ایکسرے، الٹراساؤنڈ، ای سی جی، مائنراوٹی، زنانہ ومردانہ وارڈ و شعبہ دندان ساڑی  ءُ۔ ترجمان پارے کہ حاجی تا سفری و ہنکینی آسراتی نیوز خور انا فراوانی کن پاکستانی سول ویونیفارم آفیسر وعملہ غا تالان 390 کمکار کاریم کننگ ءُ۔ مذہبی امور نا 131 آفیسر وکمکار عملہ مین کنٹرول آفس، مدینہ و جدہ بالی پٹ، شعبہ گمشدگی و بازیابی ، مدینہ ڈیپارچرسیل، مانیٹرنگ سیل، اکاؤنٹس و انتظامیہ نا باندات آتے ہُننگ ءُ۔ مکہ مکرمہ و مدینہ منورہ ٹی تدوک آ 20 دے اٹی 115 حاجی تے پٹسا اوفتا ہنکین اسکان سرکننگا، 683 بیگ، پرس و 160 وہیل چیئر پٹسا مالک آتسکان سرکننگا۔ اونا پاننگ ئس کہ تدوک آ 20 دے اٹی خور انا 454 ، ہنکین نا 1123 وخت اس کہ ٹرانسپورٹ نا 264 غاوتاازالہ ءِ کننگا، حرم مکی ٹی پترینگوک آ کسر تیا تعینات حرم گائیڈز آک داتم اسکان 17 ہزار 924 حاجی تے راہشونی فراوان کرینو۔