اسلام آباد۔ 30 مئی (اے پی پی) مسابقی کمیشن آف پاکستان واپاری و اقتصادی سرجزآتا غٹ بشخ آتیٹی آجو و انصاف اٹ مسابقت ءِ پک کننگ و گچین حکمرانی ءِ مون آ دننگ اٹ اہم کڑد ادا کیک۔ دساہیت ءِ مسابقتی کمیشن آف پاکستان نا چیئرمین ڈاکٹر کبیر احمد سدھو اسلام آباد چیمبرآف کامرس اینڈ انڈسٹری ٹی حوال اٹی پارے۔ ڈاکٹر کبیر احمد سدھومستی پارے کہ مسابقتی کمیشن آف پاکستان و اسلام آباد چیمبرآف کامرس اینڈ انڈسٹری شریداری اٹ جان جوڑ کاروباری چاگڑد نا مون آ دننگ اٹ گڑاس کاروباری ادارہ غاتا کنڈآن غیر منصفانہ طرزعمل نا بابت گڑتی و غاوتے مر کننگ اٹ اہم کڑد ادا کیک۔ سی سی پی نا کارکڑد ءِ مون آ تخسا اوپارے کہ سی سی پی کانود نا خلاف ورزی کروک آتیا بھلو جرمانہ اس بیٹ کننگک و چندی مقدمہ غاتے ہم گڈیکو فیصلہ غاتیکن عدالت عظمیٰ ٹی پدتموک ءُ۔ اسلام آباد چیمبرآف کامرس اینڈ انڈسٹری نا صدر احسن ظفر بختاوری تینا بیابخیری ٹی غٹ کاروباری ادارہ غاتے اسہ وڑ وارخواہی فراوان کننگ نا گرج آ زور شاغا و پارے کہ بیرہ کاروبار کننگ اٹ آسانی و صارف آتا فائدہ کن کارٹیلز نا برخلاف سخت کارروائی کننگے۔
