کوئٹہ۔ 29 مئی (اے پی پی) وزیرداخلہ بلوچستان میر ضیاء اللہ لانگو پارینے کہ قلات اٹی برجاشونداری ڈٹ آتیٹی ڈیوالئی ءِ سگپنہ، علاقہ ٹی امن و ایمنی تون اوار ایلو ویل آتاایسری نا بابت گام گیج کننگ انگ ءِ۔ داخیال آتا درشانی ءِ او قلات نا دورہ ٹی کرے۔ داوخت آ وزیرداخلہ نا کماشی ٹی قلات اٹی برجاشونداری ڈٹ آتیٹی پیش رفت، امن وایمنی تون اوار ایلو امور تیادیوان اس اڈتننگا۔ ہراٹی ڈپٹی کمشنر قلات بلال شبیر، اسسٹنٹ کمشنر قلات و ایلو بڑزکو کمامدارآک بشخ ہلکر و حوال تسر۔ دیوان اٹی وزیرداخلہ بلوچستان انتظامیہ ءِ امن و ایمنی نا حالیت و شونداری ڈٹ آتا پیش رفت نا بابت پارت کرساپارے کہ دا بابت ڈیوالئی ءِ سگنگ پننگک۔ دورہ ٹی وزیرداخلہ قلات، خالق آباد کمپلیکس و ایلو علاقہ غاتا ہم دورہ ءِ کرے و متبر والس تون اواری اٹ اوفتا ویل آتے بِنگ۔ وزیرداخلہ بلوچستان پارے کہ تدوک آ دے تیٹی چیف جسٹس بلوچستان ہائی کورٹ نا کنڈآن دورہ ءِ قلات اٹی خالق آباد کمپلیکس نا شونداری کاریم ءِ بناکننگ نا پرمان آن علاقہ نا مخلوق اٹی خوشی اس تالان مس و اومیت ءِ کہ خالق آباد کمپلیکس زوت پورو کننگک۔ اوپارے کہ علاقہ نا مخلوق کنےآ ہرا پت انا درشانی ءِ کرینے اوفتا است خواہی تیا پورو وڑاٹ سلنگ نا کوشست کیوہ، علاقہ نا ویل آتا ایسری نا بابت نئے بیرہ صوبائی کابینہ بلکن ایوان اٹ ہم توار بڑز کرسا کیوہ۔ اوپارے کہ قلات تون اوار مچ آ صوبہ ٹی بھتہ خوری ناعمل ءِ توننگ کن سخت گام گیج کننگ انگ ءِ ۔ اوپارے کہ وزیراعلیٰ بلوچستان نا کماشی ٹی مخلوق حکومت صوبہ نا شونداری و شونہالی، بے روزگاری نا چٹفنگ و گڈگورننس ناقیام کن کوشست کننگ ءِ۔
