کوالالمپور۔ 29 مئی (اے پی پی) بنجائی وزیر ڈٹ بندی، شونداری و خصوصی گام گیج احسن اقبال ایشین پراڈکٹیوٹی آرگنائزیشن نا کنڈآن پالیسی ، اسٹریٹجک سوچ، گچین سرکڑدہ و مینجمنٹ نا کمک اٹ راجی و اقتصادی شونداری نا کوشست آتیٹی شاندار کڑد آ ایوارڈ تننگانے۔ پلاننگ کمیشن نا کمامدارآتا رداٹ دا ایوارڈ اودے بحیثیت بنجائی وزیر اونا غٹ مد آتیٹی دوئی کروک سرسہبی تیا تننگا۔ احسن اقبال 2013-2018و 2022-2023اٹی پاکستان نا وزیر ڈٹ بندی رہینگا۔ او 2017-2018ٹی بطور وزیرداخلہ خذمت سرتس۔ احسن اقبال جہانی نیٹ ورکس نا کمک اٹ پاکستان اٹ پیدواری لائخی تے ودفنگ کن پوسکن آ ڈٹ آتے نافذ کرے۔ احسن اقبال شونداری کن گچین پالیسی وضابطہ جوڑ کرے ہرافتا پاکستان نا پیدواری ایجنڈا و جم شونداری ٹی خاطرخواہ کڑد اسے۔ بنجائی وزیر احسن اقبال ءِ دا ایوارڈ ملائیشیانا شار کوالالمپور اٹی چارشنبے نادے آ ایشین پراڈکٹیوٹی آرگنائزیشن نا گورننگ باڈی نا66 می دیوان اٹی تننگا۔ دا تنظیم اٹی پاکستان تون اوار دنیا نا 21 ملک آک اوار ءُ۔ داایوارڈ ءِ ہمو بندغ آتے تننگک ہرافک تینا کاریم، متاثرکن خیال و اثرورسوخ نا کمک اٹ قومی یاعلاقائی کہول آ راجی و اقتصادی پروڈکٹیوٹی ٹی گچینی کن مثالی کڑد ادا کیر۔ ایشین پراڈکٹیوٹی آرگنائزیشن نا قیام 1961اٹی ایشیاپیسفک ڈیہہ اٹی تین پہ تینی کمکاری نا کمک اٹ پیدواری لائخی تے ودفنگ کن کننگاسس۔ داتنظیم صنعت، کشت وکشار، سروس و پبلک سیکٹراٹی پالیسی ایڈوائزری سروسزنا کمک اٹ ڈیہہ انا پائیدارراجی و اقتصادی شونداری کن کوشست کننگ ءِ۔
