نیویارک۔ 29 مئی (اے پی پی) نیویارک اٹی پاکستانی قونصل جنرل عامر احمد اتوزئی سٹی میئر ایرک ایڈمزاتون اوڑدہی کرے ہراٹی پاکستان و نیویارک نا نیام اٹ واپار و زرکاری ٹی ودکی نا گمان تیا گپ وتران کننگا۔ دااوڑدہی تدوک آ دے نیویارک نا میئر ایرک ایڈمز نا کنڈآن اونا ہنکین آ درملکی قونصلر آتیکن ناشتہ ٹی مس۔ دادود انا بست وبند ءِ نیویارک اٹی سوسائٹی آف فارن قونصلز کریسس ہرا دنیا نا غٹ آن بھلا قونصلر کوراٹی درملکی قونصل آتے متحد کروک آاسہ دستخطی تنظیم اسے۔ پاکستانی قونصل جنرل میئر نیویارک اتون اوڑدہی آن پد پارے کہ ننا گپ وتران بھرمی مس۔ اوپارے کہ نن تینا کمیونٹی تے فائدہ تننگ کن چندی بشخ آتیٹی کمکاری ءِ سوگو کننگ کن سنبرینگوک اُن۔ میئر نیویارک تین پہ تینی افہام و تفہیم و کمکاری ءِ مون آ دننگ کن داوڑنا دود آتا اہمیت آ زور شاغا۔ اونیویارک نا کثیر الثقافتی منظرنامہ ٹی پاکستانی کمیونٹی نا اہم شریداری ءِ امنا کرسا اوفتا جوش وجوزہ و لچک نا ستا ءِ کرے۔ داوخت آپاکستانی قونصل جنرل چندی ملک آتا قونصل جنرل آتون ہم گپ وتران کرے ہراٹی بنداوی وڑاٹ ہڑتوم آ کنڈآتا کمکاری ءِ سوگو کننگ و واپاری تعلقداری تے مون آ دننگ نا گام گیج آتیا گپ وتران کننگا۔ نیویارک میئر ایرک ایڈمز مہمان تیان تران کرسا نیویارک نا تانہ بانہ ٹی درملکی شاری و متنوع کمیونٹی تا نمان شریداری آ زور شاغا۔ اوپارے کہ ننا دفتر دا آزموندہ غاتا قدر ءِ کیک ہرا ننا شار و ننا قوم ہڑتوم آتے سوگو کیک۔ اونا پاننگ ئس کہ کنا دفترنا جہانی تعلقداری نا شعبہ ذاتی تعلقداری و قابل رسینگ مواصلاتی چینل آتے مون آ دننگ کن سنبرینگوک ءِ۔
