راولپنڈی۔ 29 مئی (اے پی پی) پاکستان جہانی برادری اتون اواری اٹ امن نا رکھ ءِ کروک آتا جہانی دے انا وخت آ اقوام متحدہ ناامن مشن اٹی خذمت سرتروک آ بہادر نرینہ و نیاڑی تے خراج تحسین پیش کرینے۔ آئی ایس پی آر نا رداٹ پاکستان اقوام متحدہ نا امن مشن اٹی غٹ آن زیات کمک کروک آ ملک آتیان اسٹ ءِ، داوخت آ کم و ود 3000 پاکستانی سیکورٹی کارندہ کانگو، سویلی سوڈان، ابی، نیامی افریقی جمہوریہ، قبرص، دیکی صحارا و صومالیہ ٹی مشن اٹی خذمت سرتننگ اٹی ءُ۔ 1960 آن پد آن، پاکستان دنیا نا کم و ود غٹ براعظم تا 29 ملک آتیٹی اقوام متحدہ نا 48 امن مشن تیٹی اِرا لکھ 35 ہزار سیکورٹی کارندہ فراوان کرینے۔ آئی ایس پی آر نا رداٹ پاکستان ءِ اقوام متحدہ نا قیام امن مشن کن تینا متکن آ تعلقداری آ گمر ءِ۔ نناامن دستہ غاک جھیڑہ غاتیان زہمی علاقہ غاتیٹی امن و سوگوی ءِ مون آ دننگ کن بھلو جیرت، کسبی مہارت و لگن نا درشانی ءِ کرینو۔ جم وڑاٹ 181 پاکستانی سیکورٹی کارندہ غاک فرض انا ادائیگی ٹی جون تا قربانی ءِ تسنو۔ امن نا دا جہانی دے آ نن جہانی امن نا عظیم مسخت کن اوفتا خذمت و قربانی تے خراج تحسین پیش کینہ۔ پاکستان امن مشن اٹی زالبول آتا گچین نمائندگی کن اقوام متحدہ نا صنفی بریبری نا حکمت عملی کن ہم سنبرینگوک ءِ۔ پاکستان اقوام متحدہ نا امن دستہ غاتا رکھ و سلامتی ءِ گچین کننگ نا گام گیج آتاہم مخ تفی ءِ کیک۔ آئی ایس پی آر نا رداٹ اقوام متحدہ نا امن مشن اٹی پاکستان نا شریدار جہانی امن و سلامتی کن ننا قوم انا عزم انا شاہدی ءِ و پاکستانی امن دستہ بے چیٹ علاقہ غاتیٹی ہندی کمیونٹی تا گچینی کن کاریم ءِ برجاتخک۔
