اسلام آباد۔ 29 مئی (اے پی پی) وزیراعظم محمد شہباز شریف پارینے کہ پاکستان امن و انصاف نا دوئی کننگ کن سنبرینگوک ءِ و نن ہندن ءُ مستقبل اسے نا جوڑ کننگ کن تینا عزم انا درشانی ءِ کینہ ہراڑے امن مرے و انسانیت شون ہلے۔ چارشنبے نادے آ اقوام متحدہ نا رداٹ امن کن خذمت سرتروک آتا جہانی دے انا وخت آ راجی رابطہ نا ویب سائٹ ایکس آ تینا ٹویٹ اٹی وزیراعظم پارے کہ پاکستان اینو جہانی برادری اتون اواری اٹ اقوام متحدہ نا امن دستہ غاتیٹی خذمت سرتروک آ تے خراج تحسین پیش کننگ ءِ۔ امن دستہ غاتیٹی پاکستان نا نمائندگی ءِ کروک آتون خصوصی تشکر نا درشانی ءِ کینہ ہرادنیا ٹی امن ءِ برقرارتخنگ کن اہم کڑد ادا کریر۔ وزیراعظم پارے کہ ننا بہادر زالبول آتون اوار 2 لکھ 30 ہزار فوجی کارندہ غاک اقوام متحدہ نا امن مشن اٹی خذمتسرترسا 64 سال آتیٹی قوم انا کاٹم ءِ گمراٹ بڑزکرینو و اوفتے ٹی ننا181 شہید ہم اوار ءُ ہرافک جہانی امن کن تینا جون تے ندر کرینو، نن اوفتے ہم خراج عقیدت پیش کینہ۔ اوفتا بے لوث جیرت و قربانی مدام ننا است آتیٹی ءِ۔ وزیراعظم پارے کہ پاکستان امن و انصاف نا دوئی کننگ کن سنبرینگوک ءِ و اینو نن اسہ ہندن ءُ آخبت اسے نا جوڑ کننگ کن تینا عزم انا درشانی ءِ کینہ ہراڑے امن مرے و انسانیت شون ہلے۔
