کوئٹہ۔ 27مئی (اے پی پی) پاکستان مسلم لیگ (ن) نا مرکزی سینئر راہشون چوہدری نعیم کریم پارینے کہ مچ آ قوم ایٹمی طاقت مننگ آ گمر کیک، دھماکہ غاتا سوب آن پاکستان نا دفاع ناقابل تسخیر جوڑ مس اینو اسہ دشمن اس ہم پاکستان نا کنڈآ خراب انگا نظراٹ ہُننگ کپک۔ کوئٹہ رابطہ آفس آن جاری مروک آاسہ بیان اسے ٹی چوہدری نعیم کریم پارینے کہ مسلم لیگ (ن) نا قائد و مسکوہی وزیراعظم میاں نواز شریف جہانی زور ءِ خاطر اٹ اتپرسا پاکستان ءِ ایٹمی واک جوڑ کننگ نا تاریخی فیصلہ اس کرے و 28 مئی 1997 آ بلوچستان نا سنگلاخ و بڑزو بالا مش تیٹی سرسہب ایٹمی دھماکہ کننگا ہراڑآن اقوام عالم اٹ پاکستان نا شان و شرف اٹی ودکی مس و مچ آ قوم ایٹمی طاقت مننگ آ گمر کیک۔ اوپارے کہ ایٹمی لائخی نا دوئی کننگ آن پاکستان نا جغرافیائی سیمک رکھ مسر و بھارت کون آ دشمن نا جنگی جنون و جارحیت پسندانہ عزم انا مقابلہ ءِ کننگ ممکن مننگ کرے اینو اگہ نن ایٹمی لائخی تخپروسن تو دشمن ننے نسخان تننگ کریکہ۔ اوپارے کہ 28 مئی یوم تجدید عہد نا دے ءِ دااہم دے انا وخت آ مچ آ قوم و سلہہ بند فوج ءِ است انا حب اٹ مبارکباد پیش کینہ نن غٹ مسلمانک اواری اٹ ملک ءِ ایٹمی واک جوڑ مننگ نادے آ جوان وڑاٹ اڈایتن و تالان کین تانکہ پاکستان نا دشمن خراب انگا نظر اٹ ہُننگ آن مست ہزار وار سجفنگ آ بیوس مریر۔ اوپارے کہ پاکستان عالم اسلام نا اولیکو ایٹمی ملک ءِ ہندا سوب آن امت مسلمہ نا اسٹ انگا ایٹمی واک مننگ نا سوب آن دشمن ملک آتا خن تیٹی سُرک ولے پاکستانی فوج انا بہادر گلزادہ غاتا سوب آن اسہ دشمن ملک اس ہم پاکستان نا برخلاف جارحیت نا سجفنگ کپک مستین اٹ ننا ازلی دشمن بھارت جارحیت کرے تو تاریخ گواہ ءِ کہ ننا فوج انا سوب آن اودے ذلت آمیز شکست نصیب مس۔
