نارووال۔ 27 مئی (اے پی پی) بنجائی وزیر ڈٹ بندی و شونداری پروفیسر احسن اقبال پارینے کہ وزیراعظم 8 ارب روپئی نا خڑچ آن نیشنل نیوٹریشن پروگرام نا بناءِ کرینے ہرانا کمک اٹ غذائیت نا کمتی نا ویل اتون مون تننگک۔ او نارووال اٹی شاری تیکن کنوئی آ ساف دیر انا آسراتی نا بنانا دود آن تران کریکہ۔ اواہلیان نارووال کن دا آسراتی نا فراوانی آ نیسلے پاکستان لمیٹڈ نا منت واری ءِ ہرفے۔ اوپارے کہ ننا ملک اٹی کنوئی آ ساف دیر انا کاختی زڑدوئی نا تالانی نا سوب آتیٹی اوار ءِ۔ وزیراعظم 8 ارب روپئی نا خڑچ آن نیشنل نیوٹریشن پروگرام نا بناءِ کرینے ہرانا کمک اٹ غذائیت نا کمتی تون مون تننگک۔ کنوئی آ ساف دِیر و متوازن غذائیت آ چکار کرسا ہی نن قوم ءِ جان جوڑ جوڑ کننگ کینہ۔ نیسلے فارہیلدی کڈ پروگرام ءِ ہراسکول اسکان بایدے دننگے۔ نارووال اٹی تعلقدار محکمہ غاتیان کنوئی آ دیر انا ٹیسٹ ءِ کرفنہ تانکہ ننے معلوم مننگ کے کہ ننا مخلوق ہرادِیر کننگ اٹی ءُ او اوفتا جان جوڑی کن امر ءُ۔ تینا مخلوق ءِ چندی ناجوڑی تیان بچفنگ کن نن ساف دیر و غذائیت آ بایدے پبی چکار تخن۔ بنجائی وزیر کمیونٹی انگیجمنٹ پروگرام نا رداٹ نیسلے پاکستان لمیٹڈ نا کنڈآن متکن آ کچہری روڈ آ پاسپورٹ آفس نا مون آ کلین اینڈ سیف ڈرنکنگ واٹر فیسلٹی ناباقاعدہ بنانادود اٹی بحیثیت مہمان خاص بشخ ہلک۔ دا فیسلٹی ٹی ہڑدے 10 ہزار بندغ ءِ 24 ہزار لیٹر ساف دیر فراوان کننگک۔ داوخت آ نیسلے پاکستان لمیٹڈ نا کنٹری مینجر جیسن ایون سینا کمپنی نا کنڈآن کمیونٹی انگیجمنٹ پروگرام نا رداٹ مچ آپاکستان اٹی کمیونٹی ڈویلپمنٹ نا ہر پروجیکٹ آتا بارواٹ پارے۔
