بنجائی وزیر داخلہ محسن نقوی تون سری لنکن ہائی کمشنر نا اوڑدہی، 43 بند پاکستانی تا پدی آ امنا

اسلام آباد۔ 24 مئی (اے پی پی) بنجائی وزیر داخلہ محسن نقوی تون سری لنکانا ہائی کمشنر ایڈمرل (ر) رویندراچندراسری وجے گونارتنے اوڑدہی کرے ہراٹی سری لنکا ٹی بند 43 پاکستانی شاری تا دمدستی وطن آ پدی آ امناتون اوار تین پہ تینی است خواہی نا امور و ہڑتوم آ کنڈآتا تعلقداری نا مون آ دننگ آ گپ وتران کننگا۔ سری لنکن ہائی کمشنر پاکستانی بندی شاری تا دمدستی وطن آ واپسی نا چرجوئی ٹی ہرممکن کمکاری نا باوری کرفے۔ بنجائی وزیرداخلہ بندی تا وطن آ واپسی کن کمکاری آ سری لنکن ہائی کمشنر نا منت واری ءِ ہرفے۔ وزیرداخلہ محسن نقوی پارے کہ پاکستانی بندی تا ملک واپسی کن بست وبندآتے منہ دے اٹی گڈیکو دروشم اس تننگک ، وزارت داخلہ دا بندی تے پدی اتنگ کن تدوک آ اسہ تُو آن سری لنکن کمامدارآتون کاریم کریکہ۔ اوپارے کہ سری لنکا و پاکستان نا نیام اٹ تعلقداری تدوک آ 7 دہائی تیٹی سوگو آن سوگوتر مرسا کننگ ءُ، پاکستان تین پہ تینی تعلقداری تے چندی بشخ آتیٹی پین مون آ دننگ نا خواہندار ءِ، اوڑدہی ٹی ہڑتوم آ ملک آتا بندی تا تینا ملک آ واپسی کن دمدستی گام گیج کننگ آ امنا کننگا۔ اوڑدہی ٹی سیکورٹی و انسداد منشیات نا چرجوئی ٹی کمکاری ءِ ودفنگ آ امنامس۔ وزارت داخلہ غا بننگ آ بنجائی وزیر داخلہ محسن نقوی سری لنکن ہائی کمشنر ءِ بخیرکرے۔ بنجائی سیکرٹری داخلہ خرم علی آغا، چیئرمین نادرا لیفٹیننٹ جنرل محمد منیر افسر و تعلقدار آفیسر آتیان بیدس سری لنکن ہائی کمیشن نا کمامدارآک ہم داوخت آ ساڑی ئسر۔