کشاری صارف، حکومتِ پاکستان و حکومت بلوچستان نا ذمہ بجلی نا 641 ارب روپئی واجب الاداءُ، سردار اویس احمد خان لغاری

اسلام آباد۔ 24 مئی(اے پی پی) بنجائی وزیر بجلی( پاور ڈویژن) سردار اویس احمد خان لغاری پارینے کہ کشاری صارف، حکومت پاکستان و حکومت بلوچستان نا ذمہ بجلی واجبات نا 641 ارب روپئی واجب الاداءُ، بنجائی حکومت بلوچستان اٹی کشاری ٹیوب ویل آتے شمسی توانائی آ گدریفنگ کن تینا بشخ ءِ تننگ کن تیار ءِ، بلوچستان حکومت دانا وڑوڈول اس شین ایتے، بلوچستان اٹی غیرکانودی ٹاسفارم تے چٹفنگ اٹ سینیٹر و ایم این ایک کمک کیر، 24 گھنٹہ بجلی نا فراوانی ءِ نن پک کینہ۔ جمعہ نادے آ سینیٹ نا دیوان اٹی سینیٹر دنیش کمار نا چکاری نوٹس نا ورندی ٹی اوپارے کہ بلوچستان اٹی کم از کم 27437ٹیوب ویل404فیڈرآتیا چلینگ انگ ءُ، داکان بیدس 10 آن 12 ہزار غیرکانودی ٹاسفارم چلینگ انگ ءُ و دا 404 فیڈرز96 درسد نسخان آ چلینگ انگ ءُ۔ اوپارے کہ اووربلنگ کروک آ و صارف آتون اواری اٹ اوفتے بجلی دُزی نا وڑوڈول آتے ہم ہیل تروک آکارندہ غاتا برخلاف سخت کارروائی مریک۔ بدبختی اٹ بجلی نا بشخوک آ کمپنی تے کمپنی تیانبار ہی چلیفنگپک، وسفارش اٹ کاریم ءِ چلیفنگ نا کوشست کننگک،نن چانہ کہ ننا آفیسر آک دا گڑاتیٹی اوار ءُ، بلوچستان اٹی 80 ارب روپئی نا نسخان ہڑدے ئی شش گھنٹہ بجلی تننگ نا سوب آن مریک ۔ اوپارے کہ ننتون بجلی فاضل ءِ، گنجائش ساڑی ءِ ولے اوفتے کاریم اٹ اتنگ پننگ ءِ۔ اوپارے کہ داوخت آ کشاری صارف، حکومت پاکستان و حکومت بلوچستان نا ذمہ 641 ارب روپئی واجب الاداءُ ، وزیراعلیٰ تون ننا بھاز جوان ہیت وگپ مس۔