اقوام متحدہ نا جنرل اسمبلی ٹی ہرسال 11 جولائی آ سربرینیکاٹی کشت وخون نا یات اٹی جہانی دےءِ اڈتننگ نا منظوری، پاکستان نا پبی مخ تفی

اقوام متحدہ۔ 24 مئی(اے پی پی) اقوام متحدہ نا جنرل اسمبلی ہرسال 11 جولائی آ سربرینیکا ٹی کشت وخون نا یات اٹی جہانی دے ءِ اڈتننگ نا منظوری ءِ تس۔ اقوام متحدہ نا جنرل اسمبلی ٹی دا چرجوئی ٹی قرارداد جرمنی و روانڈاپیش کرے ہرانا پاکستان پبی مخ تفی ءِ کرے۔ بوسنیا ہرزوگوینا نا خلق سربرینیکاٹی 11 جولائی 1995ٹی بوسنیا نا سربیائی 8 ہزار 372 بوسنیائی مسلمان تے کسفنگا وخت اس کہ ہزار آ بندغ آک بے اُرا و مچ آ کمیونٹیک بھس مسر۔ سربیانا سخت اعتراض آتیا جرمنی و روانڈانا کنڈآن سپانسر کروک قرارداد نا مخ تفی ٹی 84 و مخالفت اٹی 19 وونٹ تما وخت اس کہ 68 ملک آک رائے شماری ٹی بشخ ہلتور۔ قرارداد نا منظوری ءِ ترسا جنرل اسمبلی سیکرٹری  جنرل آن بروک آ سال سریبرینیکا نسل کشی نا 30 سال پورو مننگ نا تیاری کن اسہ آؤٹ ریچ پرورام اس کننگ کن ہم پارے۔ داوخت آ اقوام متحدہ ٹی پاکستان نا آخبتی مندوب منیراکرم پاکستان نا وونٹ انا وضاحت ءِ کرسا سریبرینیکا نا بھلا سانحہ ءِ مون آ تخسا پارے کہ اقوام متحدہ سربرینیکا و روانڈاٹی دُوارہ نسل کشی ءِ دُوارہ مننگ آن توننگ نا تینا عزم آ بایدے سلے۔