سلامتی کونسل درملکی کوزہ نا چٹفنگ و فلسطینی و کشمیری تا حق خودارادیت ءِ پک کننگ کن گام گیج کے، منیر اکرم

اقوام متحدہ۔ 23 مئی (اے پی پی) پاکستان اقوام متحدہ نا سلامتی کونسل آن درملکی کوزہ نا چٹفنگ و کشمیری و فلسطینی تا حق خودارادیت ءِ مون آ دننگ کن گام گیج کننگ نا خواست کرینے۔ اقوام متحدہ ٹی پاکستان نا آخبتی مندوب منیر اکرم سلامتی کونسل نا قرارداد 1265(1999) نا بیست ءُ پنچ می سال دے انا چرجوئی ٹی اڈ ہلوک ’’سلہہ بند جھیڑہ غاتیٹی شاری تا رکھ‘‘ انا سرحال آ اسہ شرہ سے ٹی جنگ آتیان زہمی علاقہ غاتیٹی اختہ شاری تا رکھ انا گرج آ زور شاغسا 15 باسکی کونسل ءِ پارے کہ دا جھیڑہ غاتا بنداوی سوب آتے ایسر کننگ، سیاسی ایسر ءِ مون آدننگ، جہانی انسانی  کانود نا پابندی ءِ پک کننگ و جنگی ڈوہ و انسانیت نا برخلاف ڈوہ اکن استثنیٰ ءِ چٹفنگ المی ءِ۔ پاکستانی سفیر پارے کہ سلامتی کونسل ڈوہدار تے سلہہ غاتا فراوانی ءِ تورسا، دا ڈوہ تا زموار ریاست و بندغ آتا برخلاف کارروائی کرسا، و درملکی کوزہ نا رداٹ زندءِ تیرکننگ آ بیوس شاری تے رکھ فراوان کرسا جنگی ڈوہ انا مرتکب بندغ آتے جوابدہ گوندسا تینا کڑد ءِ ادا کننگ کیک۔ پاکستانی مندوب پارے کہ اسرائیل نا کنڈآن غزہ ٹی فلسطینی شاری تا برخلاف برجاجنگ اٹی زور انا اندھادھند کاریم اٹ اتنگ آ غم و غصہ نا درشانی ءِ کرسا اوپارے کہ جہانی عدالت غزہ ٹی اسرائیلی فوجی کارروائی ءِ’’قابل مذمت نسل کشی‘‘ گوندانے و دا ہمیشہ کن دنیا نا ضمیر آ اسہ داغ اس سلک۔ اوپارے کہ غزہ ٹی کشت وخون نا زموار اونا زمواری آن تینے چٹفنگ کپسہ ودااوفتے مدام بے چین تخک۔