وزیراعظم شہباز شریف متحدہ عرب امارات نا اسہ دے ئی دورہ غا روانہ مس

راولپنڈی۔ 23 مئی (اے پی پی) وزیراعظم محمد شہباز شریف متحدہ عرب امارات نا اسہ دے ئی دورہ غا روانہ مس۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ نائب وزیراعظم ووزیرخارجہ اسحاق ڈار، بنجائی وزیر دفاع خواجہ آصف، بنجائی وزیر واپار جام کمال خان، بنجائی وزیر حوالکاری و شینکاری عطاء اللہ تارڑ و وزیراعظم نا خصوصی کمکار طارق فاطمی ئسک ہم وزیراعظم تون اوار ءُ۔ وزیراعظم نا وزارت عظمیٰ نا منصب ءِ سنبھالنگ آن پد متحدہ عرب امارات نا دااولیکو دورہ ءِ۔ ابوظہبی ٹی وزیراعظم محمد شہباز شریف و صدر متحدہ عرب امارات محمد بن زاید النہیان نا نیام اٹ اوڑدہی مریک۔ اوڑدہی ٹی متحدہ عرب امارات و پاکستان نانیام اٹ کمکاری ءِ پین مون آ دننگ نا بابت گپ وتران مریک۔ وزیراعظم تینا دورہ ٹی انفارمیشن ٹیکنالوجی نا بشخ آن تعلق تخوک آ پاکستانی و متحدہ عرب امارات نا کاروباری شخصیت و زرکارآتون اوڑدہی کیک۔ وزیراعظم متحدہ عرب امارات نا بڑزکو حکومتی عہدیدار و اماراتی کاروباری شخصیت آتون ہم اوڑدہی کیک۔ وزیراعظم نا دورہ، پاکستان و متحدہ عرب امارات نا نیام اٹ ساڑی متکن آ برادرانہ تعلقداری نا اسہ پوسکن آ دور انا بناءِ۔ وزیراعظم نابڑزکو اماراتی سرکڑدہ و کاروباری برادری تون اوڑدہی حکومت نا سفارتی سرسہبی و سنگت ملک آتاپاکستان اٹ زرکاری نا ودوک آ کچ انا عکاسی ءِ کیک۔