وزیراعظم شہباز شریف نا دورہ ءِ ایران اٹی تاجکستان نا صدر تون اوار جہانی راہشون آتون اوڑدہی

تہران۔ 23 مئی (اے پی پی) وزیراعظم محمد شہباز شریف دورہ ءِ ایران اٹی ایماندار ایرانی صدر ڈاکٹر سید ابراہیم رئیسی و اونا سنگت آتا بابت اڈ ہلوک ہڑزخواہی دود اٹی تاجکستان نا صدر امام علی رحمان تون اوار جہانی راہشون آتون اوڑدہی کرے۔ وزیراعظم آفس نا میڈیا ونگ آن جاری بیان نا رداٹ چارشنبے نادے آ وزیراعظم محمد شہباز شریف ایران نا صدر ڈاکٹر سید ابراہیم رئیسی و وزیرخارجہ تون اوار ہیلی کاپٹر شکست نا شہید آتا ہڑزخواہی کن ایران نا اسہ دے ئی دورہ غا ہنا۔ داوخت آ وزیراعظم نا تاجکستان نا صدر امام علی رحمان تون اوڑدہی مس۔ اوڑدہی ٹی ہڑتوم آ کنڈآتا تعلقداری ءِ پین سوگو کننگ و تین پہ تینی است خواہی نا امور آ گپ وتران کننگا۔ وزیراعظم تون آذربائیجان نا وزیراعظم علی اسدوو ہم اوڑدہی کرے ہراٹی پاکستان و آذربائیجان نا ہڑتوم آکنڈآتا تعلقداری تے پین سوگو کننگ نا بابت گپ وتران کننگا۔ وزیراعظم باکوٹی مروک آ29 می اقوام متحدہ کانفرنس آف پارٹنر نا سرسہبی کن نیک است خواہی نا درشانی ءِ کرے۔ وزیراعظم و قطر انا امیر شیخ تمیم بن حمدآل ثانی نا نیام اٹ اوڑدہی ہم مس۔ اوڑدہی ٹی پاک قطر ہڑتوم آ کنڈآتا تعلقداری و تین پہ تینی است خواہی نا ایلو امورآ گپ وتران کننگا۔ وزیراعظم ترکیہ نا نائب صدر جودت یلماز و ترکیہ نا وزیرخارجہ ہاکان فیدان تون جتا جتا اوڑدہی ہم کرے۔ اوڑدہی تیٹی ہڑتوم آ کنڈآتا و تین پہ تینی است خواہی نا ایلو امور آ گپ وتران کننگا و وزیراعظم ترک صدر رجب طیب اردوان ءِ دورہ ءِ پاکستان نا سلہ نا درشانی ءِ کرے۔ وزیراعظم ایران نا سپریم لیڈر نا تعینات کروک انتظامی اسمبلی’’مجمع تشخیص مصلحت نظام‘‘ نا باسک احمدی نژاد تون ہم اوڑدہی کرے۔