اسلام آباد۔ 20 مئی (اے پی پی) بنجائی وزیر امور کشمیر و گلگت بلتستان و سیفران انجینئر امیر مقام وزیراعظم محمد شہباز شریف نا خصوصی پارت آ اسلام آباد بالی پٹ آ کرغزستان نا دارالحکومت بشکیک آن خصوصی جہاز اٹ سہب انا وختی سرمروک آ زہمی طالب علم آتے بخیرکرے۔ وزارت نا کنڈآن جاری بیان نا رداٹ بنجائی وزیر پارے کہ ای نمے غٹ ءِ تینا کنڈآن ، حکومت و مچ آ قوم انا کنڈآن بخیر اٹ پاوہ۔ اوپارےکہ وزیراعظم داواقعہ غان دمدستی پد پاکستانی طالب علم آتا رکھ اکن ترندی اٹ گام گیج کرے، وزیراعظم تینٹ حالیت آتا چاروکی ءِ کریکہ۔ انجینئر امیر مقام طالب علم آتا تاثرآتے ہُننگ، اوفتا طب انا اَرفے و وطن آ پدی بننگ آ اوفتے بخیراٹ پارے۔ اوباوری کرفے کہ ہرکس کہ بننگ خوائے حکومت پاکستان اودے ہروڑنا کمک فراوان کیک، پین جہاز آتا کمک اٹ طالب علم آتے وطن آ پدی اتینہ۔ انجینئر امیر مقام پارے کہ پاکستانی تا جان ومال انا رکھ ءِ ہر حال اٹ پک کینہ، ننا اولیت پاکستانی طالب علم آتا رکھ ءِ۔ بنجائی وزیر طالب علم آتون بشکیک اٹی پیش بروک آ است ہسون واقعہ نا بارواٹی معلومداری ہم ہلک۔
