لاہور۔ 20 مئی (اے پی پی) بنجائی وزیر حوالکاری ، شینکاری ، قومی ورثہ و دودوربیدہ عطاء اللہ تارڑ پارینے کہ ورناک ننا آخبت آک ءُ، حکومت نا پورو چکار پاکستانی طالب علم آتیاٹی ءِ، بشکیک آن پدی بروک آ طالب علم آتا آسراتی کن ہرممکن گام گیج کننگک، اللہ نا شکر ءِ کہ بشکیک واقعہ ٹی اسہ طالب علم اس ہم زوال کتنے۔ داہیت ءِ او علامہ اقبال انٹرنیشنل بالی پٹ آ بشکیک آن خصوصی جہاز انا کمک اٹ پاکستان آ بروک آ 170 پاکستانی طالب علم آتا بیابخیری نا وخت آ میڈیا تون گپ وتران کرسا پارے ۔ بنجائی وزیر حوالکاری پارے کہ کرغزستان نا ہندی ایئرلائن ایرونومیڈنا چارمیکو جہاز اینو پاکستان آ سرمسنے ہراٹی 170 پاکستانی طالب علم وطن آ پدی بسر۔ جم وڑاٹ 540 طالب علم پاکستان آ پدی سرمسنو۔ اوپارے کہ بشکیک اٹی حالیت آک تشویشناک ئسر ، ننا طالب علم آتیٹی خوف و بھیم تالان مس، وزیراعظم لمحہ بہ لمحہ پاکستانی سفیر تون رابطہ ٹی ئس، اوطالب علم آتا فریشانی آ دمدستی ایکشن ہلک۔ اوپارے کہ پاکستانی طالب علم آتا آسراتی کن حکومت ہرممکن گام گیج کننگ اٹی ءِ۔ بنجائی وزیر پارے کہ طالب علم آتا رکھ و اوفتا تعلیم کن ہرممکن گام گیج کینہ، حکومت نا پورو چکار پاکستانی طالب علم آتیاٹی ءِ، ننا کوشست مریک کہ طالب علم آتے حالیت آتا گچین مننگ آ پدی گدریفنگے تانکہ او تینا ڈگری تے پورو کننگ کیر۔ بنجائی وزیرپارے کہ وزیراعظم نا خصوصی پارت آ پاکستان آپدی بروک آ طالب علم آتا بیابخیرکن وزیر آک بالی پٹ آتیا ساڑی ءُ تانکہ طالب علم آتے دا احساس مف کہ او تنیا ءُ۔ اوپارے کہ وزیراعظم نا وژن ءِ کہ طالب علم آک ننا آخبت آک ءُ، اوفتے ہچ ءُ مشکل اس پیش بف، حکومت اوفتا باندات آتے تینٹ ہُننگ اٹی ءِ، ننا اولی کوشست مریک کہ پاکستانی طالب علم آتا ویل آتے ایسر کننگے۔ بنجائی وزیرحوالکاری پارے کہ اللہ نا شکر ءِ کہ پاکستان نا بابت ہچ ءُ جونی نسخان اس متنے، نن داواقعہ غا بایدے زمواری نا درشانی ءِ کین۔ اوپارے کہ اسہ اسپیشل فلائیٹ اس ٹھپی طالب علم آتے پاکستان آ اتنگ ءِ۔ داکان مست بنجائی وزیر حوالکاری بالی پٹ آ پاکستان آ سرمروک آ طالب علم آتے بخیرکرے و اوفتے پھل پیش کرے۔ داوخت آ طالب علم و اوفتا خاہوت آتون گپ وتران کرسا بنجائی وزیر حوالکاری باوری کرفے کہ طالب علم آتا ویل آتے اولیتی بنداوتیا ایسر کننگک۔
