اسلام آباد۔ 20 مئی (اے پی پی) ڈپٹی اسپیکر قومی اسمبلی سید غلام مصطفیٰ شاہ ہیلی کاپٹر شکست اٹ ایران نا صدر سید ابراہیم رئیسی، ایرانی وزیرخارجہ حسین امیر عبداللہیان و ہیلی کاپٹر اٹ سوار اونا سنگت آتا نہادی جونی نسخان تیا ڈکھیائی وا ست ہسونی نا درشانی ءِ کرینے۔ دوشنبے نادے آ قومی اسمبلی سیکرٹریٹ آن جاری بیان نا رداٹ ڈپٹی اسپیکر تینا ہڑزخواہی کلہو اٹی پارے کہ است ہسون شکست اٹی ایرانی صدر، وزیرخارجہ و ایلو بندغ آتا زوال کننگ نا خبر بھاز رنجیدہ کروک آءِ۔ پاکستان نا پارلیمان ، حکومت و الس ایرانی پارلیمان، حکومت والس نا ڈکھیائی ٹی بریبر نا شریک ءُ۔ اوپارےکہ ایرانی صدر سید ابراہیم رئیسی نا کزیت عالم اسلام کن بھلو نسخان اسے۔ ایرانی صدر نا ڈیہہ اٹی امن وایمنی کن کروک آ کوشست آتے مدام یات تخنگک۔ صدر رئیسی نڈر، مخلص و مصالحت پسند راہشون اس ئس۔ صدر ابراہیم رئیسی نا پاکستان تون مخلص سنگتی ءِ اسُل است آن دننگ مفک۔ اوپارے کہ سید ابراہیم رئیسی نا سیوت بین المسلمین نا مون آ دننگ کن کوشست آتے خراج تحسین پیش کینہ۔ صدر ابراہیم رئیسی امت مسلمہ نا سیوت نا داعی ئس۔ ایرانی صدر سید ابراہیم رئیسی نا کزیت آن ودی مروک آ خلاء تادیر پُرمننگ کپک۔ سید میر غلام مصطفی ٰشاہ پارےے کہ ایرانی وزیر خارجہ حسین امیر عبداللہیان ایران۔ پاکستان تعلقداری نا مون آ دننگ اٹ مدام مثبت کڑد ادا کرے۔ ایرانی وزیرخارجہ نا کزیت ایرانی حکومت کن بھلو نسخان اسے۔ اودعاکرے کہ اللہ تعالیٰ شکست اٹی زوال کروک آ بندغ آتا درجہ غاتے بڑز و ایماندار تا پدسلوک وایرانی الس ءِ صبر وجمیل عطاکے۔
