اسلام آباد۔ 20 مئی (اے پی پی) وزیراعظم محمد شہباز شریف ہیلی کاپٹر نا شکست اٹی ایران نا صدر ڈاکٹر ابراہیم رئیسی و اونا سنگت آتا زوال کننگ آ است ہسونی نا درشانی ءِ کرسا ماتن ناپڑو کرینے کہ ڈاکٹر ابراہیم رئیسی پاکستان نا جوان ءُ سنگت اس ئس، ننے جوان ءُ خبراسے نا اومیت ئس ولے افسوز داوڑمننگ کتو، صدر رئیسی و اونا سنگت آتا شرف و برادر ایران تون یکجہتی نا درشانی کن قومی بیرک شیف سلک۔ دوشنبے نادے آ تینا ٹویٹ اٹی وزیراعظم پارے کہ پاکستان ءِ اسہ تُو اسے آن ہم کم وخت اسہ تاریخی دورہ سے آ صدر ابراہیم رئیسی و وزیرخارجہ حسین امیر عبداللہیان نا مہمانداری نا شرف دوئی مس۔ اوپاکستان نا جوان ءُ سنگت اس ئس۔ اوپارے کہ دا سانحہ غا پاکستان اٹی ماتن نادے اڈتننگک و صدر رئیسی و اونا سنگت آتا شرف و ایلم ملک ایران اتون یکجہتی نا درشانی ناوڑاٹ بیرک شیف سلک۔ وزیراعظم پارے کہ صدر رئیسی نا ہیلی کاپٹر نا کریش لینڈنگ نا حوال نا بابت مروک آ پیش رفت ءِ بے چینی اٹ ہرانہ۔ جوان ءُ خبراسے نا اومیت ئس ولے افسوز داوڑ متو۔ وزیراعظم پارے کہ او پاکستان نا حکومت و الس تون دا بھلا نسخان آ ایرانی قوم اتون ہڑزخواہی و ہمدردی نا درشانی ءِ کیک۔ اودعاکرے کہ اللہ تعالیٰ شکست اٹی شہید مروک آتے جنت الفردوس اٹی بڑزکو ہند اس عطاکے۔
