کوئٹہ۔ 17 اپریل (اےپی پی) بلوچستان اٹی دیکی تہاتا اسہ پین سسٹم اس پترینگا۔ محکمہ موسمیات صوبہ نا کرکی علاقہ غاتیٹی ترند پِر انا پیشن گوئی ، پِرتیان جل تیٹی جل دیر انا خطرہ ءِ۔ محکمہ موسمیات نا رداٹ 17 اپریل آن 19 اپریل اسکان ترند شنزہ ئی آ پِر تا سوب آن گوادر، جیونی،اورماڑہ، واشک، پنجگور، قلات ، خضدار، آواران، تربت نا علاقہ غاتیٹی طغیانی نا گڑتی ءِ وخت اس کہ بروک آ 24 گھنٹہ ٹی صوبہ نا ایلو ضلع، پسنی، اورماڑہ، لسبیلہ، خضدار، قلات نوشکی، جھل مگسی، نصیر آباد ، سبی کوہلو، ڈیرہ بگٹی ، لورالائی، ہرنائی ، کوئٹہ، زیارت ، چمن، قلعہ سیف اللہ، شیرانی، ژوب، موسیٰ خیل وبارکھان اٹی ہورہ و گروک اٹ پِر و گڑاس ہند آتیا شنزہ ئی آ پِر و ترونگڑنا ہم گمان ءِ۔ پی ڈی ایم اے صوبہ ٹی پِرتیان الرٹ جاری کرینے، کمامدارآک شاری تے کچہ انگا اُراتیٹی رہینگ و بے گرج سفرآن پاناد کننگ نا مشورہ تسنو۔ وزیراعلیٰ بلوچستان میر سرفراز بگٹی صوبہ ٹی ساڑی آ پِرتیان غٹ کمشنر و ڈپٹی کمشنر آتے پارت جاری کرینے کہ او تینا تینا علاقہ غاتیٹی پِرتتون مون تننگ کن غٹ وسیلہ غاتے کاریم اٹ اتیر۔ محکمہ موسمیات نا رداٹ داتم اسکان بلوچستان نا کرکی علاقہ جیوانی ٹی 44، گوادر 16، تربت15، پنجگور12، خضدار 09، قلات 04، نوکنڈی 03، دالبندین اٹی 02 ملی میٹر پِر ریکارڈ کننگانے۔
