اسلام آباد۔ 17 اپریل (اے پی پی) جہانی مالیاتی فنڈ (آئی ایم ایف ) بروک آ سال پاکستان اٹی افراط زر نا کچ اٹی نمان کمتی و جم قومی پیدوار اٹی ودکی نا پیشن گوئی کرینے۔ داہیت ءِ جہانی مالیاتی فنڈ انا کنڈآن جاری کروک ورلڈ اکنامک آؤٹ لک 2024 اٹی پاننگانے۔ جہانی مالیاتی فنڈ انا رداٹ سال 2023اٹی پاکستان اٹی افراط زر انا کچ 29.2 درسد ئس ہرا سال 2024اٹی 19.6 درسد و بروک آ سال (2025) اٹی 9.6 درسد مریک۔ آئی ایم ایف نا رداٹ برجاسال اٹی پاکستان نا جی ڈی پی نا نمو نا کچ اِرا درسد و بروک آسال 3.5 درسد اسکان مننگ نا گمان ءِ۔ آئی ایم ایف تینا رپورٹ اٹی پارینے کہ برجاسال اٹی حسابات جاریہ نا کھاتہ غاتا نسخان جی ڈی پی نا کچ آن منفی 1.1 درسد و بروک آ سال منفی 1.2 درسد اسکان مننگ نا گمان ءِ۔ آئی ایم ایف تینا رپورٹ اٹی بروک آ سال اٹی بے روزگاری نا کچ 7.5 درسد اسکان مننگ نا گمان ظاہر کرینے۔ رپورٹ نا رداٹ سال 2023 اٹی جہانی نمو نا کچ 3.2 درسد ئس ہرا برجاو بروک آسال ہم 3.2 درسد نا کہول آ مریک۔ شون ہلوک ملک آتیٹی سال 2023اٹی اقتصادی نمو نا کچ 1.6 درسد ئس ہرا برجاسال 1.7 درسد و بروک آ سال 1.8 درسد مریک۔ مون آ بروک زرگزران تیٹی تدوک آ سال اقتصادی نمو نا کچ 4.3 درسد ئس، ہر ابرجاسال اٹی 4.2 درسد و بروک آ سال ہم 4.2 درسد سلک۔
