اسلام آباد۔ 16 اپریل (اے پی پی) وزیراعظم محمد شہباز شریف پارینے کہ سعودی عرب مشکل وخت اٹی مدام پاکستان تون تفینے، پاکستان ہڑتوم آملک آتا نیام اٹ واپار و زرکاری نا بشخ آتیٹی کمکاری ءِ مون آ دننگ نا خواہندار ءِ، سعودی وزیرخارجہ نا کماشی ٹی ڈل انا دورہ ءِ پاک سعودیہ سٹریٹجک و واپاری شریداری نا پوسکن آ دور انا بناءِ وخت اس کہ سعودی وزیرخارجہ فیصل فرحان السعود پاکستان و سعودی عرب نا تعلقداری تے سوگو کننگ و واپاری وزرکاری ، شریداری ءِ پین مون آ دننگ کن سعودی عزم انا درشانی ءِ کرینے۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ او سعودی وزیرخارجہ شہزادہ فیصل بن فرحان السعودیہ نا کماشی ٹی سعودی ڈل وزیراعظم محمد شہباز شریف تون وزیراعظم ہاؤس اٹی اوڑدہی کرے۔ سعودی ڈل اٹی نائب وزیر زرکاری انجینئر ابراہیم بن یوسف المبارک، سعودی وزیر ماحولیات، آبی وسیلہ و کشت وکشار انجینئر عبدالرحمان بن عبدلامحسن الفضلی ، سعودی وزیر صنعت و معدنی وسیلہ انجینئر بندربن ابراہیم بن عبداللہ آلخریف و بڑزکو سعودی کمامدار و سفارتی کارندہ غاک اوار ئسر، وخت اس کہ اوڑدہی ٹی بنجائی وزیر اسحاق ڈار، خواجہ محمد آصف، سید محسن رضانقوی، جام کمال خان، راناتنویر حسین، عبدالعلیم خان، ڈاکٹر مصدق ملک، سردار اویس خان لغاری، ڈپٹی چیئرمین پلاننگ محمد جہانزیب خان، قومی اسمبلی نا باسک رومینہ خورشید عالم و حکومتی کمامدارآک اوار ئسر۔ اوڑدہی ٹی وزیراعظم ڈل انا پاکستان آ بننگ آ خیرمقدم ءِ کرے و سعودی سرکڑدہ، خادم الحرمین شریفین سلمان بن عبدالعزیز آل سعود و شہزادہ محمد بن سلمان آل سعود کن نیک است خواہی نا کلہو ءِ تس۔ اوڑدہی ٹی وزیراعظم سعودی ڈل ءِ پاکستان اٹی زرکاری نا گیشتر کچ انا بابت معلومدار کرے۔ سعودی وزیرخارجہ شہزادہ فیصل بن فرحان آل سعود پاکستان سعودیہ تعلقداری نا سوگوی،واپاری و زرکاری شریداری ءِ پین مون آدسننگ کن سعودی عزم انا درشانی ءِ کرے۔ اوڑدہی ٹی ہڑتوم آملک آتا نیام اٹ چندی بشخ آتیٹی کمکاری و زرکاری ان مون آدننگ نا بابت گپ وتران مس۔ وزیراعظم ڈل ءِ خصوصی زرکاری سہولت کونسل و اونا ملک اٹی زرکاری نا مون آ دننگ کن گام گیج آتیان ہم معلومدار کرے۔ وزیراعظم خصوصی زرکاری سہولت کونسل اٹی ملک اٹی زرکاری نا مون آ دننگ کن غٹ ادارہ غاتا کمک و چیف آف آرمی اسٹاف جنرل سید عاصم منیر نا اہم کڑد ءِہم مون آ تخا۔ اوڑدہی ٹی فلسطین نا مقبوضہ علاقہ غاتا بگڑینگوک آ حالیت آتیا ہم گپ وتران مس۔ وزیراعظم سعودی ولی عہد شہزادہ محمد بن سلمان ءِ پاکستان نا دورہ نا سلہ نا کلہو ہم تس۔ داوخت آ وزیراعظم پارے کہ پاکستان و سعودیہ عرب نا نیام اٹ متکن آ ایلمی تعلقداری ءِ ہرانا درور ملیپک۔ سعودی عرب مشکل وخت اٹی مدا پاکستان تون تفینے ۔ چنکا عئید آن دمدستی پد سعودی ڈل انا دورہ ءِ پاکستان ستاکڑزک۔ دورہ ءِ پاکستان سعودیہ اسٹریٹجک و واپاری شریداری نا پوسکن آ دور انا بناءِ۔ وزیراعظم پارے کہ پاکستان ہڑتوم آ ملک آتا نیام اٹ واپار وزرکاری نا بشخ آتیٹی کمکاری ءِ پین مون آ دننگ نا خواہندار ءِ۔ پاکستان پیشن نا زرکاری نا مون آ دننگ و ایلم ملک آتون شریداری ءِ تین پہ تینی وڑاٹ فائدہ ئی کننگ کن گام گیج کننگ ءِ۔ پاکستان سعودی عرب نا کنڈآن زرکاری ءِ ودفنگ آ سعودی سرکڑدہ غاتا منت وار ءِ۔ وزیراعظم پارے کہ پاکستانی الس ولی عہد شہزادہ محمد بن سلمان نا دورہ ءِ پاکستان نا چاری ءِ۔ داوخت آ ڈل وزیراعظم نا پاکستان نا کنڈآن جم و جوش اٹ بخیر ومہمانداری آ منت واری ءِ ہرفے۔ سعودی ڈل انا دورہ ءِ پاکستان، وزیراعظم محمد شہباز شریف نا ساڑی آ دورہ ءِ سعودی عرب نا رداٹ مننگ ءِ۔
