اسلام آباد۔ 16 اپریل (اے پی پی) پاکستان و سعودی عرب ہڑتوم آ ایلم ملک آتا تین پہ تینی فائدہ کن سوگو شریداری ءِ برجاتخنگ و اقتصادی کمکاری ءِ پین مون آ دننگ نا عزم انا درشانی ءِ کرینو۔ داہیت ءِ صدر مملکت آصف علی زرداری و سعودی وزیرخارجہ شہزادہ فیصل بن فرحان السعود نا نیام اٹ اوڑدہی ٹی مس۔ سعودی وزیر خارجہ سے شنبے نادے آ داڑے ایوان صدر اٹی اسہ بڑزکو واکداری ڈل اسے تون اوار صدر مملکت تون اوڑدہی کرے۔ ایوان صدر نا پریس ونگ انا رداٹ سعودی ڈل اٹی وزیر دِیر و کشت وکشار، وزیر صنعت و معدنی وسیلہ، کمکار وزیر زرکاری، سعودی خصوصی کمیٹی نا سروک و وزارت توانائی و سعودی پبلک انویسٹمنٹ فنڈ انا بڑزکو کمامدارآک اوار ئسر۔ پاکستان پیپلزپارٹی نا چیئرمین بلاول بھٹو زرداری ، وزیرخارجہ محمد اسحاق ڈار، وزیر نجکاری و زرکاری بورڈ عبدالعلیم خان، وزیر پیٹرولیم و آبی وسیلہ مصدق مسعود ملک، وزیر صنعت و پیدوار رانا تنویر حسین و سیکرٹری خارجہ سائرس سجاد قاضی و بڑزکو سرکاری کمامدارآک ہم اوڑدہی ٹی ساڑی ئسر۔ صدر مملکت ڈل ءِ بخیرکرسا پارے کہ پاکستان وسعودی عرب نا نیام اٹ متکن و دہائی تیا متکن تعلقداری ءِ و پاکستان ساڑی آ تعلقداری تے مریس مدتی تزویراتی و اقتصادی شریداری ٹی بدل کننگ خواہک۔ اوداہیت ءِ مون آتخا کہ پاکستان نا حکومت و الس خادم حرمین شریفین شاہ سلمان بن عبدالعزیز آل سعود نا بے کچ شرف ءِ کیرہ و سعودی عرب تون سلرہ۔صدر مملکت پارے کہ اسلامی دنیا نا شونہالی سعودی عرب نا شونداری تون وابستہ ءِ۔ اوسعودی ولی عہد و سعودی عرب نا وزیراعظم محمد بن سلمان نا جیرت مندانہ و دوراندیش سرکڑدہ و ویژن 2030 نا رداٹ مروک آ قابل ذکر پیش رفت انا ستاءِ کرے۔ داوخت آ سعودی وزیرخارجہ پارے کہ سعودی عرب پاکستان تون تینا تعلقداری تے بھاز اہمیت ایتک و اپاکستان تون سوگو شریداری کن سنبرینگوک ءِ۔ اوداہیت ءِ مون آتخا کہ ہڑتوم آملک آتا نیام اٹ سوگو تعلقداری ءِ و او کیہی دہائی تیان اسہ ایلو نا کمک ءِ کرسا بسنو۔ اوسعودی عرب نا شونداری ٹی پاکستانی پردیسی تا کڑد انا ستاءِ کرے۔ اوسعودی سرکڑدہ غاتا کنڈآن نیک است خواہی نا درشانی ءِ کرے وسعودی عرب کن پاکستان نا اہمیت ءِ تالان کرے۔ ہڑتوم آ فریق آک علاقائی حرکیات و دے ٹک نیامی نا ساڑی آ پیش رفت آ گپ وتران کریر و دمدستی و غیرمشروط جنگ بندی و غزہ ٹی اسرائیلی ظلم آتے بند کننگ آ زور شاغار۔
