واشنگٹن۔ 16 اپریل (اے پی پی)بنجائی وزیر خزانہ و محصولات محمد اورنگزیب پارینے کہ اقتصادی اصلاحات نا پروگرام اٹی کمکاری کن جہانی مالیاتی فنڈ اتون کیہی ارب ڈالر نا پوسکن آ وام معاہدہ غا گپ وتران نا بناءِ کننگانے، واپاری جنگ اٹی پاکستانی کن ویتنام کون آ کڑد ادا کننگ و امریکہ ءِ تینا برآمد آتیٹی ودکی کننگ نا اسہ جوان ءُ موقع اس میسر ءِ۔ اوداہیت ءِ سے شنبے نادے آ دورہ ءِ واشنگٹن اٹی فرانسیسی خبررساں ایجنسی ءِ انٹرویو ترساپارے۔ وزیرخزانہ پارے کہ داوخت آ مست آن ساڑی مسہ ارب ڈالر مالیت نا سٹینڈ بائی معاہدہ نا رداٹ پروگرام چُٹنگ نا خڑک ءِ و دامعاہدہ نا 1.1 بلین ڈالر نا گڈیکو قسط انا دا تُو انا ایسر اٹی منظور مننگ نا گمان ءِ۔ وزیرخزانہ پارے کہ پاکستان کیہی ارب ڈالر مالیت نا وام پروگرام نا بابت آئی ایم ایف تون گپ وتران نا بناءِ کرینے ہرا کیہی سال تیا تالان مریک۔ اوپارے کہ تدوک آ سال نا برعکس دا سال پاکستان نا زرگزران نا گچین بناکرینے، آئی ایم ایف تون پوسکن آ پروگرام نا گمان آتون ہی مارکیٹ نا پت اٹی ودکی مون آ بسنے۔ اوپارے کہ پاکستان آئی ایم ایف آن کم آن کم مسہ سال انا پروگرام کن رابطہ کننگ ءِ انتئے کہ ننے پنجرجاتی اصلاحات نا ایجنڈا ءِ عملی دروشم اس تننگ کن دانا گرج ءِ۔ اومستی پارے کہ مئی نا ارٹ میکو یا مسٹ میکو ہفتہ اسکان پروگرام نا بابت بنداوی امور ءِ طے کننگ اسکان سرمرینہ۔ وزیرخزانہ پارے کہ امریکہ پاکستان نا بھلا واپاری شریداری ءِ۔ امریکہ مدام خاص وڑاٹ زرکاری نا بابت پاکستان نا کمک ءِ کرینے۔ چین پاکستان اقتصادی راہداری نا ذکر ءِ کرسا وزیرخزانہ پارے کہ دانا رداٹ چین بنداوی پنجر ءِ شونداری تننگ کن بھلو زرکاری اس کرینے۔ اوپارے کہ واپاری جنگ اٹی پاکستان کن ویت نام کون آ کڑد ادا کننگ و تینا برآمد آتیٹی ودکی نا اسہ جوان ءُ موقع اسے۔ ریاستی ملکیتی ادارہ غاتیٹی اصلاحات و نجکاری پروگرام نا سوج آ او پارے کہ پی آئی اے نا نجکاری نا بابت ننے بروک آ تُو یا اوکان گڑاس یزات مد اٹی ممکنہ بولی دہندگان تا است خواہی نا بابت معلوم مریک و ننا است خواہی ءِ کہ دا عمل ءِ جون انا ایسر اسکان پورو کننگے۔ بروک آ اِرا سال تیٹی نجکاری نا پروگرام اٹی ترندی اتنگک۔ یات سلے کہ وزیرخزانہ آئی ایم ایف و جہانی بینک انا سالانہ دیوان نا وخت آ امریکہ نا دورہ ءِ کننگ ءِ۔
