واشنگٹن۔ 16 اپریل (اے پی پی) بنجائی وزیر خزانہ محمد اورنگزیب پارینے کہ آئی ایم ایف و جہانی بینک کون آ ادارہ غاک چاگڑدی بدلی تیان زہمی ملک آتیٹی مالیاتی شمولیت و چاگڑدی رداٹ جوان پنجرجاٹ و ڈٹ آتیٹی کمکاری کن بایدے مون آ بریر ، جہانی مالیاتی فنڈ اتون تین پہ تینی پت اتون مون آ ہِننگ اُن، جی ڈی پی تناسب اٹ خراج و زرکاری نا کچ ءِ 15 درسد نا کہول آ اتنگ نا کوشست کننگ اُن، زرکاری ٹی ودکی کن سنگاپور و دبئی آنبار ننے ہم سوچ اٹی بدلی اتوئی مریک۔ ننے برآمد آتیٹی ودکی کننگ نا گرج ءِ۔ داخیال آتا درشانی ءِ او تدوک آ نن واشنگٹن ڈی سی ٹی پنی آ امریکی تھنک ٹینک‘‘اٹلانٹک کونسل’’نا پروگرام اٹی گپ وتران کرسا کرے۔ وزیرخزانہ پارے کہ داسال زرگزران نا حالیت آتیٹی گچینی بسنے، ایس بی اے پروگرام آن آجو زرگزران نا سوگوی ٹی کمک ملا، جی ڈی پی سہی سمت اٹی ءِ، کشت وکشار اٹی 5 درسد نمو مس، خذمت آتا بشخ اٹی ہم نمو مسنے، افراط زر نا کچ 37 درسد نا بڑزکو آ کہول آن 20 درسد نا کچ آ بسنے، آئی ایم ایف تون مذاکرات اٹی نمو نا پلو ءِ اہمیت تننگ اُن۔ اوپارے کہ گورننس اٹی گچینی آن باندات آک گچینی نا کنڈآ ہِننگ کیرہ، کوشست مریک کہ تینا مسکوہی آزموندہ ءِ ملکی گچینی کن کاریم اٹ اتنگے۔ وزیرخزانہ پارے کہ ننا کوشست ءِ کہ جی ڈی پی نا کچ آن خراج نا کچ ءِ 15 درسد و ہندا وڑ جی ڈی پی نا کچ آن زرکاری نا کچ ءِ ہم 15 درسد نا کہول آ اتنگے، ننے برآمد آتیٹی ودکی و نجکاری نا ایجنڈا ءِ مون آدروئی ءِ، داہمو امور آک ءُ ہرا ننا زرگزران کن المی ءُ و دا ہمو امور آک ءُ ہرافتیا آئی ایم ایف تون ننا گپ وتران مرسا کرینے و مون آہم مریک۔
