اسلام آباد۔ 16 اپریل (اے پی پی) سعودی عرب نا وزیرخارجہ شہزادہ فیصل بن فرحان نا کماشی ٹی بڑزکو کہولی سعودی ڈل انا دورہ ءِ پاکستان ہڑتوم آ ملک آتا نیام اٹ تعلقداری تا اسہ پوسکن ءُ دور اسے نا بنانا نشانی ءِ و پاکستان تینا مستین نا تنیائی آن پیش تمسا جہانی کہول آ ترندی اٹ اسہ روشناءُ آخبت اسے نا کنڈآ ہِننگ ءِ۔ سرجم حوال آتا رداٹ سعودی وزیرخارجہ شہزادہ فیصل بن فرحان نا کماشی ٹی ڈل تدوک آ دے اِرادے ئی دورہ غا اسلام آباد آ سرمس۔ دورہ نا مسخت سفارتکاری، صنعت، کشت وکشار و زرکاری تون اوار چندی بشخ آتیٹی رابطہ غاتے مون آ دننگ ءِ۔ سعودی ولی عہد محمد بن سلمان نا خصوصی پارت آ مروک آ دا اہم دورہ ءِ سعودی عرب و پاکستان نا نیام اٹ اقتصادی وسفارتی تعلقداری ءِ سوگو کننگ نا تین پہ تینی عزم ءِ تالان کیک۔ سعودی ڈل انا وزیراعظم پاکستان محمد شہباز شریف تون اوارا ہم پاکستانی کمامدارآتون اوڑدہی تیان 5 ارب ڈالر نا بھلو زرکاری اسے نا بنائی پڑوآن تین پہ تینی کمکاری ءِ پین مون آ دننگ نا کسر آوار مریک ہراکہ اسہ نتیجہ خیز شریداری نا بناءِ۔ سعودی ڈل انا دورہ ٹی پاکستان اٹی کشت وکشار، توانائی، آئی ٹی، ٹرانسپورٹیشن و ایلو صنعت آتیٹی زرکاری کن سعودی عرب نا است خواہی ءِ مون آتخسا سرجمی اٹ گپ وتران کننگک۔
