کوئٹہ۔ 16 اپریل (اے پی پی) کوئٹہ شار انا کیبی ٹی واقع غٹ ڈیمک رکھ ءُ اوفتے ہچ ءُ خطرہ اس اف داوخت آ ڈیم تیٹی 10 ہزار ایکڑ فٹ دِیر کوڑی مسنے، شاریک ہروڑناخطرہ ٹی دِیر اٹ ہِننگ آن پاناد کیر محکمہ ایری گیشن ڈیم تا پدریسہ چاروکی ءِ کننگ اٹی ءِ۔ محکمہ ایری گیشن نا کمامدارآتا رداٹ کوئٹہ شار انا کیبی ٹی واقع ڈیمک داوخت آ پورو رکھ ءُ و اوفتے ساڑی آ پِر تیان ہچ ءُ خطرہ اس اف کوئٹہ شار انا نواح ٹی واقع ڈیم تیٹی 25 ہزار ایکڑ فٹ دِیر کوڑی کننگ نا گنجائشت ساڑی ءِ وخت اس کہ داوخت آ 10 ہزار ایکڑفٹ آن زیات دیرکوڑی کننگانے۔ کمامدارآک پاریر کہ گڑاس مخلوق اگست 2022 ء ٹی پِر تیان پد بروک آ نوکاپی دیر انا عکس شیئر کرسا مخلوق اٹی خوف و بھیم ودی کننگ نا کوشست آتیٹی لگوک ءُ، شاری خوفزدہ مفس اسہ ڈیم اسے آن ہم خطرہ اف۔ کمامدارآک پاریر کہ تدوک آ نن ہوکا تالان کننگا کہ کرخسہ ڈیم دِیر آن پُرمسنے و بے وخت پِننگ کیک اوکان پد کمشنر کوئٹہ ڈویژن حمزہ شفقات، ڈپٹی کمشنر سعد ابن اسد و ایری گیشن کمامدار آک کرخسہ ڈیم انا دورہ ءِ کریر اوفتے پاننگاکہ ڈیم اٹی 8 ءُ نیم سد ایکڑ فٹ دیر کوڑی کننگ نا گنجائشت ءِ وخت اس کہ داوخت اسکان ڈیم اٹی 300 ایکڑ فٹ اسکان دیر کوڑی مسنے ڈیم اٹی 55 فٹ اسکان دیر کوڑی کننگ مریک، داوخت آ دِیر 20 فٹ اسکان کوڑی مسنے کمامدارآک پاریر کہ ولی تنگی ڈیم اٹی 380 ایکڑ فٹ گنجائشت ارے، ہرا پورو پُر مسنے۔ سپین کاریز ڈیم اٹی 2500 ایکڑفٹ دیرکوڑی کننگ نا گنجائشت ءِ ہراٹی 1200 ایکڑ فٹ کوڑی مسنے گڑاس ڈیم اٹی 650 ایکڑ فٹ دیر جمع کننگ ناگنجائشت ءِ ہرا پوروپُرمسنے۔ اوکان پد اسپیل وے نا کمک اٹ دیر سرہ غڑگئی ڈیم اٹی ہِننگ ءِ ہندا وڑ سرہ غڑگئی ڈیم اٹی 450 فٹ ایکڑ کوڑی کننگ نا گنجائشت ءِ ہراٹی 250 فٹ دیر جمع مسنے وخت اس کہ اغبرگ اٹی واقع ڈیم تیٹی اِرا، اِراہزار ایکڑ فٹ دیرکوڑی کننگ نا گنجائشت ءِ ہرافتیان اسہ ڈیم اس پورو پُرمسنے۔ وخت اس کہ اسہ ڈیم اٹی 1000 فٹ ایکڑ وخت اس کہ ایلوٹی 800 فٹ ایکڑ دیر مچ مسنے۔ ایری گیشن کمامدارآتا پاننگ ءِ کہ ڈیم تیٹی دیر انا کڑمبی زیات ءِ شاری تیان خواست ءِ کہ او ڈیم تیٹی دِیر اٹ ہِننگ آن پاناد کیر تانکہ جونی نسخان تیان بچنگ مرے وخت اس کہ کمامدارآک شاری تیان ہم خواست کرینو کہ پین پِر تا خطرہ نا رداٹ شاریک جل تیا ہِننگ و جل تیا جاگہ تفنگ آن پاناد کیر تانکہ جونی و مالی نسخان تیان رکھ مننگ کیر۔ ایری گیشن کمامدارآتا رداٹ ساڑی آ پِر تیان ڈیم تیٹی بھلو کچ اسے آ دیر کوڑی مننگ آن ڈغاراٹی دیر انا کچ بڑزمریک وخت اس کہ پین پِرتا حالیت اٹ ڈیم تیٹی پین دِیر ہم کوڑی کننگ مریک۔ کمامدارآک پاریر کہ فلڈ ایری گیشن اسکیم سرپول ہنہ نا کمک اٹ بروک آ نوکاپی دیر انا رخ تدوک آ نن اسہ بجہ غا ہنہ جھیل انا کنڈآ کننگاسس دوشنبے نا بیگہ نا 4 بجہ اسکان نوکاپی دیر ہنہ جھیل اٹ پدریسہ پترینگ انگ ءِ ہراڑآن ہنہ جھیل نا کچ ہم بڑزمننگءِ۔
