کوئٹہ۔ 16 اپریل (اے پی پی)پاکستان پیپلزپارٹی بلوچستان نا سیکرٹری حوالکاری سردار سربلند خان جوگیزئی بی بی آصفہ بھٹو زرداری ءِ بطور قومی اسمبلی نا باسک سوغند ہرفنگ آ مبارکبادی ترسا پارینے کہ آصفہ بھٹو قومی اسمبلی ٹی الس و خاص کر زالبول آتا حق اکن گچین توار بڑز کیک۔ داڑے جاری مروک اسہ بیان اسے ٹی سردار سربلند جوگیزئی پارے کہ دختر مشرق شہید گودی بینظیر بھٹو و صدر پاکستان آصف علی زرداری نا مسڑ بی بی آصفہ بھٹو زرداری ءِ بطور قومی اسمبلی نا باسک سوغند ہرفنگ آ مبارکبادی پیش کیوہ بے مقابلہ غان قومی اسمبلی نا باسک گچین مرسا پارلیمانی سیاست نا بناآ بی بی آصفہ بھٹو زرداری کن نیک است خواہی نا درشانی ءِ کیوہ۔ اوپارے کہ اومیت ءِ بی بی آصفہ بھٹو زرداری قومی اسمبلی نا باسک انا حیثیت اٹ تینا لمہ شہید بی بی نا وژن نا رداٹ الس خاص وڑاٹ زالبول و ورناتا توار جوڑ مریک۔ سردار سربلند خان جوگیزئی بی بی آصفہ بھٹو زرداری نا قومی اسمبلی نا باسک سوغند ہرفنگ آ صدر آصف علی زرداری ، چیئرمین بلاول بھٹو زرداری و گودی فریال تالپور تون اوار غٹ جیالہ غاتے ہم مبارکبادی پیش کرے۔
