اسلام آباد۔ 15 اپریل (اے پی پی) وزیراعظم شہباز شریف پارینے کہ کبین تیل آ چلینگوک آ بجلی نا ڈٹ آتے قابل تجدید توانائی آ گدریفنگ وخت انا گرج ءِ، بجلی نا فراوانی نا کچ اٹی ودکی المی ءِ، ونڈ، پن بجلی و شمسی توانائی نا ڈٹ آتا دوررس بھرم دوئی مریک، حکومت بجلی دُزی نا توننگ کن سنبرینگوک ءِ، بجلی نا دُزی نا توننگ اٹ پنجاب نا کارکڑد است بڈ ءِ، ایلو صوبہ غاک ہم بجلی دُزی نا توننگ کن مربوط گام گیج کیر، این ڈی ایم اے پِرتیان مروک آ نسخان تا پوروی کن صوبہ غاتون اواری اٹ جوان لائحہ عمل اس وضع کے۔ داخیال آتا درشانی ءِ او دوشنبے نادے آ داڑے بجلی نا حالیت آتا با بت بڑزکو دیوان نا کماشی ءِ کرسا کرے۔ دیوان اٹی بنجائی وزیر پاور ڈویژن سردار اویس احمد خان لغاری، بنجائی وزیر حوالکاری و شینکاری عطاء اللہ تارڑ، وزیرخارجہ سینیٹر اسحاق ڈار ، بنجائی وزیر پیٹرولیم مصدق ملک، بنجائی وزیر اقتصادی امور احد چیمہ، بنجائی وزیر دفاع خواجہ محمد آصف وایلوتعلقدار کمامدارآک بشخ ہلکر۔ وزیراعظم پارے کہ چندی وزارت آتا کارکڑد نا جاچ ءِ ہلنگ انگ ءِ۔ زرگزران نا بابت چندی دیوان مسنے۔ ملک اٹی پِر مننگ ءِ داڑآن ڈیم تیٹی ہم دیر بریک و پن بجلی نا پیدوار ودک۔ پِرتیان جونی نسخان ہم مسنے۔ چیئرمین این ڈی ایم اے ءِ پارت کرینے کہ این ڈی ایم اے صوبہ غاتون اواری اٹ لائحہ عمل اس تیارکے تانکہ ہراڑے کہ پِر آن نسخان مسنے ہموڑے کمکی گڑاتے سرکننگ مرے۔ وزیراعظم پارے کہ حکومت بجلی دُزی نا توننگ کن سنبرینگوک ءِ۔ بجلی دُزی نا توننگ کن پنجاب حکومت نا گام گیج است بڈءِ۔ ایلو صوبہ غاتے ہم دابابت گام گیج کننگے۔ دااسہ بھلو چیلنج اسے ہراڑتون مون تروئی مریک۔ وزیراعظم پارے کہ بجلی نا ترسیل نا نظام نا کچ ءِ گچین کننگ نا گرج ءِ۔ بجلی نا فراوانی نا نظام اٹی گچینی آن بیدس درکار فائدہ غاتا دوئی کننگ ناممکن ءِ۔ بجلی نا فراوانی نا نظام اٹی خامی و نزوری تے مر کننگ المی ءِ۔ بجلی نا ترسیل نا نظام نا کچ ءِ ودفنگ کن چاہندار آتا خذمت ءِ ہلنگ نا گرج ءِ تانکہ بجلی نا فراوانی نا نظام اٹ گچینی اتنگ مرے۔ وزیراعظم پارے کہ ودکی بجلی ءِ ہم کاریم اٹ اتنگ کن گام گیج کننگے۔ پن بجلی نا پیدوار ءِ ودفنگ آ چکار کروئی مریک۔ وزیراعظم پارے کہ بجلی نا ڈٹ آتے قابل تجدید توانائی آ گدریفنگ وخت انا گرج ءِ۔ ونڈ، پن بجلی و شمسی توانائی نا ڈٹ آتا دور رس بھرم دوئی مریک۔ اوپارے کہ ننے تینا سسٹم اٹی گچینی اتنگ نا گرج ءِ انتئے کہ 27 ارب ڈالر نا درآمد آتیان نن تینا بجلی و ٹرانسپورٹ نا گرج آتے پورو کننگ کن کننگ اُن۔ مافیاک ملک انا دولت ءِ پِلنگ ءُ۔ بجلی نا پیدوار کن اگہ نن گیگ بدل ذریعہ ءِ کاریم اٹ اتین تو ارب آ ڈالر نا تیل انا درآمدی بل ءِ کم کننگ مریک۔ داڑکن سرجم ڈٹ بندی اگہ کننگے تو ننے آخبت اٹ بھاز فائدہ مریک۔
