کوئٹہ۔ 15 اپریل (اے پی پی)پاکستان پیپلزپارٹی نا باسک بلوچستان اسمبلی سردار زادہ صمدخان گورگیج پارینے کہ پِر تیان زہمی تا حکومت ہرممکن گام گیج آتے پک کیک، پی ڈی ایم اے و ایلو تعلقدار ادارہ غاک پِر تا دِیر انا کشنگ کن ہیوی مشینری اسے تون کاریم اٹ لگوک ءُ، داہیت ءِ او یک شنبے و دوشنبے نا نیامی نن لاڑکانہ غان کوئٹہ غا سرمننگ آن دمدستی پد پِر تیان زہمی کوئٹہ نا چندی علاقہ غاتا دورہ ءِ کننگ نا وخت آ شاری تتون گپ وتران کرسا پارے، داوخت آ ڈپٹی ڈائریکٹر پی ڈی ایم اے فیصل طارق و پاکستان پیپلزپارٹی نا راہشون ثناء اللہ جتک ہم اوڑتون اوار ئسر۔ بلوچستان اسمبلی نا باسک سردار زادہ صمد خان گورگیج پارےکہ موسمیاتی بدلی نا سوب آن اومیت آتیا زیات پِر مسنے ہراڑآن شیفکو علاقہ غاتے دِیر ارفینے وزیراعلیٰ بلوچستان میر سرفراز بگٹی نا پارت آ پی ڈی ایم اے ، کوئٹہ میونسپل کارپوریشن و ایلو ادارہ غاک ہیوی مشینری اتون دیر انا کشنگ ءِ پک کننگ کن کوشست آتیٹی لگوک ءُ۔ اوپارے کہ شاری تے ہم مرے کہ او جل و دیر تا کشنگ نا کسر تیا تجاوزات آتیان پاناد کیر۔ اوپارے کہ صوبائی حکومت پِر تا زہمی تا ہرممکن امداد ءِ پک کیک و مشکل نا داساہت اٹی اوفتے تنیا اِلیپک۔ اوپِر و نوکاپی دیر انا کشنگ ءِ پک کننگ کن کاریم کروک آ پی ڈی ایم اے و ایلو ادارہ غاتا ملازم آتے شاباشی تس۔
