کوئٹہ۔ 15 اپریل (اے پی پی)پاکستان مسلم لیگ (ن) زالبول ونگ انا راہشون فاطمہ خان نوشکے نا خڑک بے گناہ مسافر آتے بس آن دڑفسا سم کاری کرسا شہید کننگ نا مذمتءِ کرساپارینے کہ دہشت گردی ٹی اوار زموار آک ہچ ءُ رعایت اسے نا حقدار افس، حکومت دمدستی وڑاٹ واقعہ ٹی اوار دوبہ دار آتے دزگیرکرسا اوفتے اوفتا کروک نا سزا تننگے۔ داڑے جاری مروک اسہ بیان اسے ٹی فاطمہ خان پارے کہ نوشکے نا علاقہ ٹی مسافر بس اسے آن دڑفسا بے گناہ وکودک مسافر آتے سم کاری کرسا شہید کننگ نا اخس کہ مذمتءِ کننگے کم ءِ، داوڑنا واقعہ غاتیٹی اوار زموار آک ملک و الس نا دشمن ءُ۔ اوپارے کہ حکومت دمدستی وڑاٹ واقعہ ٹی اوار دوبہ دار آتے دزگیرکرسا اوفتے اوفتا کروک نا سزا ایتے و آخبت داوڑنا واقعہ غاتا توننگ کن گچین وعملی گام گیج کے۔ اوپارے کہ دہشت گرد آک تینا ناپاک مسخت آتا دوئی کننگ کن بے گناہ مخلوق ءِ شست کننگ ءِ اوفتا برخلاف سخت آن سخت کارروائی بایدے کننگے۔ اوسم کاری آن شہید مروک آ بندغ آتا خاہوت آتون ہڑزخواہی و ہمدردی نا درشانی ءِ کرسا پارے کہ مسلم لیگ (ن) زہمی خاہوت آتا غم اٹی بریبر نا شریک ءِ۔ اوصوبائی حکومت آن خواست کرے کہ سم کاری آن شہید مروک آ مسافر آتا خاہوت آتیکن دمدستی وڑاٹ مالی امداد نا پڑو کننگے۔
