کوئٹہ۔ 15 اپریل (اے پی پی) سیکرٹری مواصلات و تعمیرات بلوچستان قمبر دشتی ساڑی آ پِر تا سوب آن محکمہ نا غٹ عملہ ءِ ہائی الرٹ مننگ نا پارت کرسا پارینے کہ محکمہ نا غٹ آفیسر و عملہ نا باسک آک ہلہلہ ئی حالیت آتون مون تننگ کن ہروخت تیار سلرو ہلہلہ ئی حالیت آتا رداٹ رابطہ سڑک آتا بحالی ءِ پک کننگ نا کوشست کیر۔ اوپارت کرے کہ بحالی نا کاریم اٹی ڈیوالئی ءِ سگنگ پننگک و غٹ ضلعی انجینئر آفیسر آک تینا عملہ و مشینری اتون الرٹ سلر، محکمہ مواصلات و تعمیرات نا عملہ ضلعی انتظامیہ و پی ڈی ایم اے ریسکیو آپریشن ٹیم اتون اواری اٹ کمکی کارروائی تیٹی بشخ ہلیر۔ دارداٹ محکمہ مواصلات و تعمیرات کوئٹہ ڈویژن پروجیکٹ ون نا عملہ سیکرٹری مواصلات و تعمیرات و کمشنر کوئٹہ ڈویژن نا پارت آتے مون آتخسا کوئٹہ شار انا چندی علاقہ غاتیٹی نوکاپی دیر انا کشنگ کن ہلہلہ ئی بنداو تیا آپریشن نا بناءِ کرینے تانکہ الس ءِ اسہ وڑنا فریشانی اسے تون ہم مون تروئی تمپ۔
