اسلام آباد۔ 09اپریل (اے پی پی) بنجائی وزیر کانود اعظم نذیر تارڑ پارینے کہ آئین اٹی پیدوار ءِ کہ سینیٹ نا پوسکن گچین مروک باسک آتا سوغند آن مست ایوان اٹی ہچ ءُ کارروائی اس مننگ کپک۔ سے شنبے نادے آ سینیٹ نادیوان اٹی اوپارے کہ ایوان اٹی پی ٹی آئی و سنی اتحاد کونسل نا باسک آتا موقف ءِ بِننگا حالانکہ آئین اٹی پیدوار ءِ کہ سینیٹ نا پوسکن گچین مروک آ باسک آتا سوغند آن مست ایوان اٹی ہچ ءُ کارروائی اس مننگ کپک۔ آرٹیکل 60 انا اِرابشخ ءُ۔ اوٹی ہم پیدوار ءِ کہ چیئرمین سینیٹ و ڈپٹی چیئرمین سینیٹ نا گچین کاری آن مست ایوان اٹی ہچ ءُ کارروائی اس مننگ کپک۔ چیئرمین و ڈپٹی چیئرمین سییٹ نا عہدہ خور مننگ آ ایوان نا باسک اسے پریذائیڈنگ آفیسر گچین کننگ مریک۔ سینیٹ نا گچین کاری ہرمسہ سال آن پد مریک۔ خیبرپختونخوا ہراٹی مخصوص نشست آتیا گچین مروک آ باسک آتا سوغندی نا بابت پشاور ہائی کورٹ نا پرمان آ عمل متنے۔ داڑآ توہین عدالت نا کارروائی مننگ ءِ و اوالیکشن کمیشن تون رجوع کرینے۔ الیکشن کمیشن فیصلہ کرینے کہ ہراتم اسکان مخصوص نشست آتیا گچین مروک آ اومیتدار آتا سوغند مفک ہمووخت اسکان خیبرپختونخوا اسمبلی ٹی 11 نشست آتیا سینیٹ گچین کاری مفک۔ دا باندات اسلام آباد ہائی کورٹ اٹی ہم زیر سماعت ءِ۔
