اقوام متحدہ۔ 09اپریل (اےپی پی) پاکستان اقوام متحدہ نا سلامتی کونسل آ زور شاغانے کہ او غزہ ٹی جنگ بندی نا خواست آ تالان تینا قرارداد 2728آ عملدرآمد ءِ پک کننگ کن جوان گام گیج کے۔ اقوام متحدہ ٹی پاکستان نا آخبتی مندوب منیر اکرم جنرل اسمبلی آن تران کرساپارے کہ دُن کہ سعودی دارالحکومت ریاض اٹی عرب او آئی سی سروکی دیوان اٹی امنا کننگاسس، 15 باسکی سلامتی کونسل اسرائیل ءِ سلہہ و گولہ بارود نا دوئی آ دمدستی پابندی خلے و غزہ ٹی فلسطینی شاری تا برخلاف اسرائیل نا ڈوہ آ اودے زموار گوندے۔ 193 باسکی جنرل اسمبلی نا دیوان فلسطین نا ویل اتون اوار دے ٹک نیامی نا حالیت آتیا ویٹو نا کاریم اٹ اتنگ آ شرہ کن اڈ ہلک۔ پاکستانی مندوب فلسطین ءِ اقوام متحدہ نا پورو باسک کننگ کن پاکستان نا بدل مفروک مخ تفی نا درشانیءِ کرسا پارے کہ دا گام فلسطینی ریاست ءِ اسہ سیاسی حقیقت اس ایتک۔ اقوام متحدہ نا جنرل اسمبلی نا دیوان امریکہ نا کنڈآن پیش کروک قرارداد 239/2024نا مسودہ ءِ ویٹو کننگ آن پد بٹنگ انگا، ہراٹی دے ٹک نیامی نا حالیت، خاص وڑاٹ فلسطین نا ویل آ گپ وتران کننگا۔
