اسلام آباد۔ 05اپریل (اے پی پی) وزیراعظم محمد شہبازشریف اسرائیلی جارحیت و ظلم و جور انا مذمت ءِ کرساپارینے کہ اسرائیل تینا غاصبانہ کوزہ ءِ برقرار تخنگ کن جہانی کانود و انسانی حق انا پدریسہ خلاف ورزی ءِ کننگ ءِ ہراڑآ جہانی برادری خاموش تماشائی نا کڑد ءِ ادا کننگ اٹی ءِ، پاکستان غاصبانہ اسرائیلی کوزہ غان نجات و 1967آن مہالو نا سیم تا رداٹ اسہ آجو فلسطینی ریاست اسے نا جوڑ کننگ اسکان تینا کودک فلسطینی ایڑھ و ایلم تا اخلاقی و سفارتی مخ تفی ءِ برجاتخک۔جمعہ نادے آوزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم جہانی یوم القدس و جمعتہ الوداع نا وخت آ تینا کلہو اٹی کرے۔ وزیراعظم پارے کہ کنتون اوار مچ آپاکستانی قوم یوم القدس نا وخت آ اسرائیلی جارحیت و ظلم و جور انا مذمت ءِ کیک و تینا کودک فلسطینی ایڑھ و ایلم تتون یکجہتی نا درشانی ءِ کیک۔ تدوک آ ہفت دہائی آن اسرائیل فلسطین و بیت المقدس آ ناروا و غیرکانودی وڑاٹ کوزہ گیرءِ و تینا دا جارحیت ءِ برقرار تخنگ کن جہانی کانود و انسانی حق انا پدریسہ خلاف ورزی ءِ کرسا بننگ ءِ ہراڑآ جہانی برادری خاموش تماشائی نا کڑد ءِ ادا کننگ ءِ۔ وزیراعظم پارے کہ دا حقیقت کس اسے نا اودیم اف کہ اسرائیلی غاصبانہ کوزہ و اودے برقرار تخنگ کن فلسطینی تیا اسرائیلی ظلم انا داستان اکتوبر 2023 آن بناکتنے بلکن تدوک آہفت دہائی تیا تالان ءِ، ولے تدوک آ سال اکتوبرآن اسرائیل کودک فلسطینی تیا ظلم وجور نا پین ظلم کننگ ءِ ۔ غزہ ٹی داتم اسکان 32 ہزار فلسطینی بشمول 17 ہزار چناشہید و 70 ہزار مخلوق ٹھپی مسنو، ہسپتال و پناہ گزین کیمپ و چناتا اسکول آتے دانستہ وڑاٹ شست کننگا، اوفتسکان کمکی گڑاتا رسینگ ءِ توننگا و اقوام متحدہ نا سلامتی کونسل نا جنگ بندی نا قرارداد آن پد ہم اینو ہم غزہ ٹی کودک شاری تیا اسرائیل نا کنڈآن بلااشتعال بمباری برجاءِ۔ پاکستان جہانی برادری آن داخواست کیک کہ او فلسطینی تا برخلاف ظلم وجور ءِ توننگ کن اسرائیل آ زور شاغنگ اٹ تینا کڑد ءِ اداکے۔
