اسلام آباد۔ 05 اپریل (اے پی پی) نیشنل ڈیزاسٹر مینجمنٹ اتھارٹی غٹ صوبہ و بنجانا نیام اٹ ہم گرنچی و شریداری ودی کننگ کن ‘ڈیزاسٹر مینجمنٹ کوآرڈی نیشن فورم’ ڈی ایم سی ایف نا پن اٹ قومی کہول انا فور م اس جوڑ کرے۔ دا فورم قومی و صوبائی ہڑتوم آ کہول آ ڈیزاسٹر مینجمنٹ نا سرجز و ڈٹ آتا چاروکی ، ہم گرنچی و شریداری کن درستی راستی کرفنگانے۔ ڈی ایم سی ایف نا بنائی دیوان اٹی این ڈی ایم اے ہیڈکوارٹر اٹی بٹنگ انگا ہرانا کماشی ءِ چیئرمین این ڈی ایم اے لیفٹیننٹ جنرل انعام حیدر ملک کرے۔ ترجمان این ڈی ایم اے نا رداٹ دیوان اٹی غٹ باسک بشمول این ڈی ایم اے نا سینئر مینجمنٹ تون اوار اوار صوبائی ڈیزاسٹر مینجمنٹ اتھارٹیز، گلگت بلتستان ڈیزاسٹر مینجمنٹ اتھارٹی و اسٹیٹ ڈیزاسٹر مینجمنٹ اتھارٹی نا ڈائریکٹر جنرل آک بشخ ہلکر۔ فورم نا سہ ماہی میٹنگ اٹی ٹرمز آف ریفرنس (ٹی او آرز) اٹی طے مروک باندات آتا بابت جاچ ءِ ہلنگک۔ داکان بیدس گام گیج و ڈٹ آتیٹی تسلسل ءِ پک کننگ کن این ڈی ایم اے نا ڈیزاسٹررسک ریڈکشن ونگ ڈی ایم سی ایف کن سیکرٹریٹ سپورت فراوان کیک۔ این ڈی ایم اے نا کنڈآن ڈی ایم سی ایف نا بنامچ آملک اٹی آفت آتون مون تننگ نا تیاری و ریسپانس نا لائحہ عمل ءِ گچین کننگ و افت آتون مون تننگ کن تین پہ تینی کمکاری نا چاگڑد ءِ مون آدننگ کن کوشست آتا اسہ اہم ءُ کڑی اسے۔
