اسلام آباد۔ 05 اپریل (اے پی پی) پاکستان تون اوار مچ آ دنیا ٹی اہل اسلام مقبوضہ بیت المقدس آ اسرائیلی کوزہ نا برخلاف جمعتہ الوداع آ یوم القدس نا وڑاٹ اڈ تسر ، کودک و بے گناہ فلسطینی تیا اسرائیلی بربریت نا ترندی اٹ مذمت ءِ کننگا۔ جمعتہ المبارک نا مچی تیٹی فلسطین و غزہ نا کودک شاری تیا اسرائیلی بربریت نا ترند انگا لوز آتیٹی مذمت ءِ کرسا عالم دین تے پارے کہ اقوام متحدہ نا قرارداد آتا رداٹ اسرائیلی کوزہ ءِ چٹفنگے انتئے کہ دا جہانی کانود نا خلاف ورزی ءِ۔ عالم دینک یوم القدس نا اہمیت ءِ مون آتخار و جہانی برادری آن خواست کریر کہ کودک فلسطینی شاری تیا اسرائیلی بربریت ءِ تورفنگ اٹ تینا کڑد ءِ ادا کیر۔ یوم القدس نا وخت آ پاکستان اٹی ہم چندی مذہبی تنظیم تا کنڈآن ریلی اڈتننگا و اسرائیلی جارحیت و مقبوضہ بیت المقدس آ ناروا کوزہ نا ترند انگا لوز آتیٹی مذمت ءِ کننگا ، بشخ ہلوک آک بینر و کتبہ ہرفیسر ہرافتیا اسرائیلی جارحیت ءِ بند کرفنگ و مظلوم فلسطینی تتون یکجہتی نا درشانی نا نعرہ نوشتہ ئسر۔ بشخ ہلوک آک جہانی برادری آ زور شاغار کہ اقوام متحدہ نا قرارداد آتا رداٹ فلسطین و مقبوضہ جموں وکشمیر ءِ آجو کرفنگ اٹ تینا کڑد ءِ ادا کیر۔
