اسلام آباد۔ 04اپریل (اے پی پی) سیکرٹری حوالکاری پیپلزپارٹی پارلیمنٹرینز شازیہ مری پارینے کہ قائد الس ذوالفقار علی بھٹو شہید استحصالی نظام ءِ چٹفے ، شہید بھٹو اسلامی ملک آتے یکجا کرے و مسلمان تا توار مس، پنچ شنبے نادے آ پاکستان پیپلزپارٹی میڈیا سیل آن جاری بیان اٹی اوپارے کہ مچ آ دنیا ٹی اینو قائد الس ذوالفقار علی بھٹو شہید ءِ خراج عقیدت پیش کننگ انگ ءِ بالآخر دا امنا کننگا کہ اودے عدالت آن انصاف ملیتو۔ اوپارے کہ قائد الس ذوالفقار علی بھٹو شہید استحصالی نظام ءِ چٹفے، او بھٹو وطن پرست راہشون اس ئس۔ اومخلوق ءِ تینا حق اکن ہیت کننگ ءِ ہیل تس، پاکستان اٹی ‘‘ اسہ بندغ اسہ وونٹ’’ نا تصور ءِ درستی راستی کرفے، شہید بھٹو اسلامی ملک آتے یکجا کرے و مسلمان تا توار مس۔ شازیہ مری پارے کہ قائد الس پاکستان ءِ ایٹمی طاقت کرسا سوگو کرے، قائد الس ذوالفقار علی بھٹو فلسیطن نا واکدار توار ئس۔ اوپارے کہ وزیراعظم ذوالفقار علی بھٹو ءِ شہید کننگتوکہ تو پاکستان پین گڑاس مسکہ، شہید بھٹو نا عدالتی خون آن پاکستان ءِ بے بدل نسخان رسینگا۔
