اسلام آباد۔ 04 اپریل (اے پی پی) اسپیکر قومی اسمبلی سردار ایا ز صادق پارینے کہ پاکستان و ایران نا نیام اٹ واپار و اقتصادی کمکاری نا مون آ دننگ وخت انا اہم خواستءِ۔ پارلیمانی رابطہ غاتا کمک اٹ ہڑتوم آملک آک پائیدار سنگتی و غٹ بشخ آتیٹی کمکاری ءِ مون آ دننگ کیرہ۔ پنچ شنبے نادے آ پارلیمنٹ ہاؤس اٹی ایران نا پارلیمانی ڈل ایرانی نائب وزیرخارجہ اقتصادی امور و سفارتکاری مہدی سفاری نا کماشی ٹی اسپیکر تون اوڑدہی کرے۔ ہراٹی ایرانی سفیر ڈاکٹر رضا امیری مغدام ہم ساڑی ئس۔ اوڑدہی ٹی ہڑتوم آ کنڈآتا تعلقداری تون اوار تین پہ تینی است خواہی نا امور آ گپ وتران کننگا۔ ایرانی ڈل انا سروک نائب وزیرخارجہ مہدی سفاری سردار ایاز صادق ءِ اسپیکر قومی اسمبلی نا منصب ءِ سنبھالنگ آ مبارکبادی تس و ایرانی ڈل انا کنڈآن اسپیکر قومی اسمبلی کن نیک است خواہی نا درشانی ءِ کرے۔
