کوئٹہ۔ 04 اپریل (اے پی پی)وکیل راہشونک پارینو کہ 4اپریل 1979نا دے مملکت خداداد پاکستان اٹی تہار انگا دے ءِ ہرادے امت مسلمہ نانڈر جیرت مند و ایٹمی قوت نا بانی گچین مروک وزیراعظم شہید ذوالفقار علی بھٹو ءِ اسہ متنازعہ عدالتی فیصلہ سے آ پاہو ترسا شہید کننگا شہید ذوالفقار علی بھٹو نا اسہ ہی ڈوہ اس ئس کہ او نیزگار آتا مخ تف و مملکت خداداد پاکستان ءِ دنیا نا عظیم تر مملکت جوڑ کننگ خوائسکہ ، پیپلزپارٹی نا بانی چیئرمین شہید ذوالفقار علی بھٹو امت مسلمہ کن ہم اسہ اومیت ناروشنائی ئس ہرا اسلامی ملک آتے دنیا نا ایلو ملک آتا مقابلہ ٹی مون آ اتنگ نا ویژن تخاکہ۔ داہیت ءِ وکیل راہشون سید ظہور آغا ایڈووکیٹ، عندلیب ایڈووکیٹ، ولارس یارخان ایڈووکیٹ، عصمت اچکزئی ایڈووکیٹ، نصیب اللہ ایڈووکیٹ، جہانزیب خان ، سردار اعجاز حسین خان ملغانی ایڈووکیٹ و ایلوفک پاکستان پیپلزپارٹی بلوچستان نا سینئر وکیل راہشون سید ظہور آغا ایڈووکیٹ نا کنڈآن کچہری بار روم اٹی شہید ذوالفقار علی بھٹو نا برسی نا رداٹ اڈ ہلوک دود آن تران کرساپاریر۔ ترانکار آک پاریر کہ شہید ذوالفقار علی بھٹو اسہ عظیم ءُ لیڈر اس ئس ہرا السی طاقت، جمہوریت، شاری آجوئی و پاکستان نا وتواجہی آ وخت اس ہم کمپرومائز کتو ہرا جمہوریت اٹی الس ءِ ہی طاقت نا سرچشمہ تکاکہ دا عظیم لیڈر ءِ گوہنگ ناغم و ڈکھیائی ہر سال 04 اپریل آ مچ آ پاکستانی قوم انا نظرآتیان پاش مرسا نظر بریک۔ اوپارے کہ اینو اگہ شہہید ذوالفقار علی بھٹو زندہ مسکہ تو پاکستان دنیا نا شون ہلوک ملک آتا صف اٹی مسکہ و امت مسلمہ نا ہم مچ آ دنیا ٹی بلند و قار مسکہ، اوفک پاریر کہ بھٹو شہید اسہ قول اسے نا پن ءِ ، ہرانا وژن پاکستان نا شونداری و شونہالی و وطن عزیز نا دفاع ءِ سربلند تخنگ ئس ہندا سوب آن شہید ذوالفقار علی بھٹو پاکستان اٹی ایٹمی قوت نا بنداو ءِ تخا و ولدا گودی بینظیر بھٹو شہید تینا دور ءِ اقتدار اٹی پاکستان ءِ میزائل ٹیکنالوجی آن لیس کرے۔
